進入考試模式

辛苦得來一個學位, 其實只是開始

入學之後要接受形形式式既考試測驗默書, 整個生活都跟住學校既時間表而運行

聯合國兒童基金會香港委員會早前表示, 兒童遊戲權利被剝削情況嚴重, 呼籲本港家長確保兒童每日「自由遊戲」至少 1 小時，促進健康發展，還他們「真正的童年」....

睇完真係好無奈, 我記得我細個讀小學只係返半日, 放學返屋企食完午餐都只係 1:00pm, 用一至兩個鐘頭做功課同埋溫習, 跟住就係同細佬由朝玩到黑, 嘈到拆天, 仲有時間睇 430 穿梭機, 明珠台學生肥皂劇等.....

而家做左媽媽, 望住小慈, 每日放學返黎都 4:00pm, 休息一陣食下茶點沖個涼再做功課, 6:00pm 做晒都已經好叻, 休息一陣又練下琴, 等我放工返黎對功課, 跟住都食晚飯, 有默書溫默書, 有測驗溫測驗, 讀下圖書跟手都要上床訓覺, 有冇機會 free play 1 小時?  唔夠啦!  我成日都鼓勵慢吞吞既小慈, 寫字寫快 d, 食飯食快 d, 小心做功課就唔駛花時間改正, 咁剩番既時間就可以玩..... 作為一個家長, 好多時都係知易行難, 每個小朋友既性格能力都唔同, 有 d 真係十項全能樣樣皆精多 d 黎密 d 手非常合作, 見佢叻你自不然就會想佢更叻更出色!  我就自問真係冇咁既本事時間訓練小慈, 佢亦都唔會俾我咁做, 秋秋亦唔肯過我殺我滅口都似  :p

岩岩先測驗周, 眨下眼又到上學期考試, 我地都已經係玩左先講, 今個星期六日進入考試模式, 不過小慈真係一個 "慢" 世魔王, 我完全似係拖住隻蝸牛去散步, 進度未如理想, 無計啦, 盡左力, 教識佢點樣溫書, 考成點以後都係靠佢自己!

星期二考試但星期一都仲係要返學, 爸爸媽媽史無前例一齊接佢放學, 開心到佢飛起 ^^

仲帶小慈女去食雪糕, 好好為佢打氣 ^^

努力呀小慈!!  爸爸媽媽天父都係你身邊幫助你, 加油!!!     :)