弟弟第 1 次去迪士尼

原來迪士尼出優惠俾所有年票持有人都可以免費帶一個朋友入樂園玩, 咁岩姑媽姑丈又有年票, 於是郭氏家族齊齊勇闖迪士尼了~~ 

首先參觀米奇大屋

弟弟眼仔碌碌有 d 緊張, 表現好奇四圍望

掉佢落巨型洗手盆, 佢都唔知發生咩事 :DDD

岩岩飲完奶, 條脷白色架

Mickey 對鞋好大隻呀!

小小畢卡索

小慈好開心

最鍾意玩 bubbles

初初弟弟都肯坐 BB 車, 但唔夠高睇野就會扭人抱

個樣好似好乖仔咁, 呃到人呀

See.... 要抱了!  不過我有 hip seat 非常幫到手, 只係攬住弟弟就 ok

小慈把握機會坐 BB 車, 弟弟一 "棄車" 就輪到佢坐

玩水幾時都咁 high

昊昊今日見到小明都好興奮呀, 呢個表哥好錫表弟

有姑媽嫲嫲幫手睇住小明, 小慈又同昊昊玩緊, 我同秋秋走去玩左一轉 space mountain!  第一次去迪士尼時我岩岩有左小慈唔玩得, 之後每次都係同小慈一齊黎唔可以賣甩佢自己走去玩, 今日終於完了我的心願!!  開心!!  好好玩呀, 不過冇日本個個咁刺激!

小慈同昊昊最鍾意玩巴斯光年射槍, encore 左 2 次

第二鍾意就係小小世界, 第 1 次玩小慈訓左, 第 2 次就到小明訓左!  呢度暗暗地涼涼地, 坐船又搖搖下仲有音樂聽, 唔訓著就奇啦

今日天氣好好呀, 25 度溫度適中又有陽光, 影 d 相都好靚~~

郭氏家族大合照, missing 返左鄉下既爺爺

嫲嫲真係好錫小明, 一有機會就會抱住佢!  小明一訓醒都會扭人抱, 岩晒

排隊等玩森林河流之旅

弟弟個樣真係好好笑呀

小慈被揀選做小船長, 表情肉緊好稱職

原來幫手做小船長有證書羅!! 

驚喜~~

小慈同埋昊昊幫手推 BB 車急急腳趕住睇煙花, 好可愛

本來弟弟係訓左覺既, 但煙花太大聲嚇醒左佢就喊喊, 仲有 Golden Mickey 太細個未識欣賞又係大聲都睇到扭計仔, 少見大場面啦, 弟弟!

不過整體上都表現得好好, 好乖!  食飽訓, 訓左可以放落 BB 車, 訓醒又食都算係咁啦! 

見你咁乖, 下次又再帶你入黎迪士尼睇風景刺激視覺發展先 ^^

弟弟 4 個月大返健康院

弟弟足 4 個月大要返健康院做發展監察, 今日爸爸得閒車我地去

弟弟要見姑娘都表現得有 d 緊張?! 

近來學識左咬下唇, 可能想出牙

度高磅重結果如下:

- 淨重: 7.28kg = 16 磅 (75線)
- 身高: 65cm (75線)
- 頭圍: 43cm (80線)

現階段維持 1 日 5 餐奶每餐 200ml, 姑娘話弟弟飲奶飲得唔錯!  我話轉左用 chu chu 白色硬膠奶嘴呢個星期明顯飲奶快左, 之前用黃色軟膠奶嘴弟弟唔啜係唔出奶個主動權係佢度, 而家轉白色我仲開大左個洞會滴奶就可以逼到佢飲, 姑娘提我要為意硬膠嘴有個三角形氣孔一定要向上, 如果唔係呀 B 會啜到個奶嘴扁晒回唔到氣, 佢唔講真係冇為意添~

另外, 我仲同姑娘講我用天然方法停人奶, 由一星期前每日泵 3 次到而家每日 1 次, 唔谷唔痛都唔泵佢出黎, 不過個量都仲係有 200ml 以上   姑娘就話方法冇問題, 不過就話我拖長左痛既時間, 可以用食藥既方法回奶就冇咁辛苦, 我知, 但我有陰影唔敢食藥麻, 比起生仔既痛苦, 胸痛谷奶我仲忍受到, 希望慢慢冇奶慢慢就唔痛啦!

弟弟健康大大隻隻我最開心 :)

弟弟練習反身

今日弟弟訓醒放佢係梳化睇電視時, 唔知佢係唔係想伸展下筋骨, 見佢左郁右郁, 郁郁下碌左一半, 佢想反身啊!!  弟弟加油 !!!!

反到呀!!  反左一半不過未識抽番隻手出黎!! 

未夠 9:00pm 又訓左 @.@  整醒佢換片換完又訓番!! 

影佢個豬樣

兒童節 @ 迪士尼樂園

鑒於小慈真係好愛 Mickey & Minnie, 而我又好想去迪士尼樂園, 於是就決定買年票咁就想幾時入去玩都得啦 :D

小慈無端端可以入迪士尼好驚喜!  其實佢之前都去過架, 不過個時太細個佢已經冇晒印象, 果然 3 歲前係咩都唔記得既....

好心急想入樂園玩所以唔想影相

入門口見到史迪仔吹 bubbles 笑到見牙唔見眼

今日 22 度有太陽又有風, 難得的好天氣

小慈開心到坐火車又笑, 玩 bubbles 又笑, 佢真係好 high 呀!

Bubbles 吹呀吹~

見到我個乖女笑成咁, 呢張年票買得值呀!!

玩水都笑到依起棚牙

好涼爽呀

玩左 2 次巴斯光年射槍就睇巡遊, 雖然今日係兒童節 + 清明節公眾假期, 但樂園冇咩人好多野都唔駛排隊, 正!

第 1 次坐船仔睇小小世界, 我都未睇過, 入面 d 公仔好靚好吸引

咖啡杯中的小小慈

咖啡杯轉到我地兩老暈陀陀, 小慈就卡卡笑

"灰姑娘旋轉木馬" 個名咁長小慈都識講

想玩小飛象, 不過條隊實在郁得太慢於是我地決定食少少野先

點知小慈就食食下薯條訓著左, 冇電了......

訓醒竟然記得自己未玩小飛象要我地即刻去, 係係係小慈公主!  小朋友真係好好記性

玩到睇埋煙花先走, 小慈超級開心盡慶而歸!!

懶訓弟弟識手執玩具

今朝好攪笑, 小慈見弟弟坐係搖椅悶悶地就俾個玩具弟弟玩, 弟弟真係識羅起個玩具研究

如果唔係件玩具真係太重, 怕且弟弟應該可以羅起搖, 弟弟個專心樣好可愛 :)

小慈好錫弟弟, 每次弟弟訓左佢都會入房裝裝下睇下佢幾時訓醒, 如果弟弟醒左小慈又會係第一個聽到架喎, 真係好留意弟弟 

今日又係, 小慈一入房見到弟弟擘大眼就即刻大叫: "媽媽~~~ 弟弟訓醒喇~~~~"

呢張相超得意呀, 小慈嘟起個嘴想錫弟弟, 弟弟個樣好矇呀

錫唔到摸下頭仔抽水都好

又堆到弟弟成個心口都係玩具, 小慈咩都俾佢玩

都唔知弟弟攪咩鬼越來越早眼訓!!  佢可以 8:00pm 就訓著, 如果唔 9:30pm 嘈醒佢飲奶佢可以直訓到凌晨 3 點架!  真係好想佢既生理時鐘較後 2 個鐘頭, 10:00pm 訓到 5:XXam 都好丫, 佢夜晚呢轉真係一訓就係熟睡個隻黎架, 好難整得醒!  但唔俾佢訓佢又喊到家無寧日, 成塊面紫色個隻  @.@

你睇佢訓左個樣幾 cute, 我成日都忍唔住錫佢啊~~ ^8^

豪邁奔放的睡姿

弟弟你快 d 快高長大識行識走啦, 小慈家姐等緊同你玩呀 ^^