相信唔單止我, 大家呢一年來冇咩出街都應該多左好多網購經驗! 我試過網購衫, 不過送到黎完全貨不對版之後就唔再買, 著上身既野都係摸過試過先安全! 其次我買得最多既 (都係 2-3 次) 就係廚房用品, 鋼板層架重疊疊送到上門咪幾好, 唔駛自己搬餐死返屋企麻!
我今次睇中左張可調節梳化椅, 弟弟好想買過張有扶手既電腦椅 (網課上得多對設備開始有要求), 之前去宜家傢俬睇過貴到癲冇買到, 呢張幾靚仔, 問過佢又話 OK, $640 唔算太貴, 就訂購啦!
訂左差不多 2 個星期先送貨, 弟弟日盼夜盼終於等到!! 送貨既時候小慈小明仲上緊網課, 好在順豐哥哥肯等一陣, 一到小息即刻飛落樓下取件! 兩姐弟興奮到錄影開箱
冇幾耐我就收到消息, 小慈小明話張櫈配件唔齊, 完全砌唔到, down 到不得了.....
好在我落 order 既時候有 cap screen, 即刻上網站 check 下有冇客戶服務, 見到佢地淨係得 email contact, 有殺錯冇放過將事情始末講一次 send 晒俾網站顯示既所有 email account, 佢寫明有 7 日鑒賞期, 有退貨換貨保證, 希望有回覆啦!
感謝天父呢間都係有良心既公司!!! 佢地好快回覆話會幫我地申請補發, 2-3 天備貨, 3-7 天派送, 我地真係 5 日就收到!!
今次爸爸係屋企一齊開箱, 好緊張! 究竟佢地既補發係送番我地欠缺既零件, 定係成張新既呢?
答案係一張全新既梳化椅!!! 今次終於齊晒配件砌到喇 YEAH!!! 不過佢地公司冇收番我地之前錯配個張, 變相而家有兩張椅係屋企, 唔知點處理好, 配件唔知可唔可以自己配呢?
張椅好厚好舒服, 你睇弟弟幾開心~
可調節既意思就係打橫瞓左係度 XDDDDD
據理力爭, 實踐消費者權益, 今次仲示範埋點樣寫投訴信俾小慈小明睇, 學到野嗎?
沒有留言:
張貼留言