遠近慈明: 2月 2021

2021年2月27日星期六

安慰

全家一齊努力左個聖誕假期, 農曆年假前返學校考試, 農曆年假後一個星期就派晒卷喇!! 由小慈家姐先拔頭籌, 數學合格不特止仲史無前例咁高分 -- 80.5 係 80.5 分啊!!!!!! 自小學三年級開始數學合格都偷笑, 真係估唔到小慈會有 8 字頭!!! 差 D 喊左出黎...... 其他由爸爸幫手由 0 開始教起既 PHYS, CHEM, GEOG, HIST, 中史全部都合格! 爸爸可以考慮轉行做補習天王 :P Business English 唔知係咩小慈自己溫有 89 分好叻叻豬! CHEM 份卷老師收番, 應該係高分因老師送出天使咭一張, 真係老懷安慰!!

呢份數學卷完全想裱起佢! 爸爸媽媽真係好開心!!

小明弟弟只有半日可以返學校對卷, 兩個鐘頭內一次過派晒 & 對晒 13 份卷非常趕時間! 大家都要帶計數機返去快速計分

弟弟專登另外用紙記低所有卷既分數方便我睇, 又用萬字夾夾好一份又一份既考試卷俾我 check, 超乖超生性啊! 非常滿意自己中學生涯第一次考試全科合格 :)

弟弟話綠色萬字夾係我同佢溫習既科目, 估都估唔到佢中史竟然 46 / 50!!! 92 分啊 OMG!!!!!

除左中史, 仲有 History 歷史 and Geography 地理之所以我要同佢溫, 因為呢 3 科都係改左課程用新書冇 pass paper 既科目, 完全冇參考唔知老師會點考, 於是局住同佢巨細無遺地溫晒所有考試範圍, 真係勁多勁辛苦, 出卷都出到我手軟架! 弟弟有咁既成績媽媽真係好開心! 一分耕耘真係有一分收穫!!

另一樣喜出望外既係弟弟 Oral 82 分竟然係全班第一!!! 重覆, 係全班第一呀!!! 第一次全班第一竟然係由外籍老師評分既 Oral, 翌日由英文老師 Miss Wong 在 Google Meet Class 時宣佈, 吩咐全班對住個鏡頭拍手俾掌聲弟弟, 勁好笑囉! 估唔到呢位 Young Man 咁 talk 得 :D 弟弟話 online 考 oral 時, 外籍老師同佢傾偈考試已經傾到好開心架喇! 真係叻仔! 俾左好多個驚喜爸爸媽媽 ^^

仲收到兩封情深既家長信俾我同爸爸

於是, 媽媽送上實質既獎勵, 雖然勤力讀書得益既係你本人, 但都好想表達下錫你地呢 D 咁乖有用功讀書既學生! 買左兩個你地好想要既水樽送俾你地, cool 耶~

仲趁戲院重開預先買飛同你地睇恨左好耐既鬼滅之刃劇場版無限烈車篇, 係唔係好驚喜先?!! 戲院雖然重開但場內唔食得爆谷, 買番屋企食左先入場啦 :DDD

早場係星期六 11:15 am 非常唔錯! 瞓到 9:00 am 起身仲可以嘆埋個靚早餐先入場

放寬番 4 人飯聚我地一家人可以一齊坐喇!

終於可以睇戲, 好滾動~~

炎柱大哥要你久候了!

咕嚕咕嚕大眼睛

之前以為冇得睇於是係網上睇左分析大約都知道故事內容, 但入戲院睇戲既感受係完全唔同的

一同抗疫! 戲院除左唔食得野全場戴口罩外, 仲要兩個兩個分開坐, 我坐佢地後面方便照顧

水皮! 喊左幾次喊到口罩都濕晒呀我! 慶功慶祝考試成績好其實唔應該揀呢套戲, 不過真係好好睇!!! 愛, 承擔, 責任係人一生都要學既功課!! 完場眼淚都未乾已經想睇多一次! 超正!! DVD, 要 get!

2021年2月21日星期日

牛牛年

好特別呀今年牛年, 完全冇新年氣氛! 我地既家族團拜因應疫情宣佈今年暫停, 舊年包左既利是都冇機會派今年要派都非常有限, 花市都話取消, 後來經過花農極力爭取年宵先至復辦, 如果唔係辛苦耕種一年既年花就要報銷損失慘重! 我地天台種生菜菠蘿都成担心機, 更何況佢地? 真係望穿秋水先到收成期, 你一個唔該話取消邊個賠? 再者, 有誰估到一年後個肺炎都仲未攪掂先得架?!

唔大攪都自己攪, 繼續去姑媽屋企食團年飯

爺爺派壓歲錢

今年應該少左好多機會逗利是, 影相留念先 :)

飯後節目竟然係小明教姑媽 post IG

當然唔少得一齊打機! 昊昊都有玩宣傳舖天蓋地既三國志

我買左 3 舊水仙花氹自己開心, 佢地非常生性年三十晚就開花喇! 今年仲有同事仔整蘿蔔糕俾我食, 工人姐姐又話開工唔放假, 連糕都唔駛我煎, 正呀!

梗係要派利是俾我對乖乖 ^8^ 祝你地身體健康! 快高長大! 開開心心!

初一天氣超好, 我地唔駛拜年好得閒, 就上天台收割啦

生菜雀口下存留反而生長得仲好! 第 4 次收割係有史以來最大塊的!

菜心翻生結果, 新成員左手香加盟, 我地又為茉莉花大幅修剪, 再試種西芹, 非常充實

士多啤梨一洗頹風生長茂盛, 葉下面竟然有幾粒士多啤梨仔真係令人驚喜! 見佢咁靚仔, 弟弟將受傷斷左幾隻腳既螳螂放入去養傷, 希望佢快 D 好番!

帶水仙花上天台影寫真, 有位小朋友不敵佢既香氣, 完全陶醉~

初二同我班老友視像見面, 大家都精精神神健健康康 :)

初三星期日, 今年撞正赤口 + 情人節, 晚市未恢復堂食, 情人們怕且好似我地咁係屋企玩煮飯仔! 今日有乖仔乖女包辦早晚餐, 一早沖咖啡俾我地飲, 夜晚又積極幫忙預備晚餐, 承傳爸爸發明既蛋汁炒飯加臘腸, 色香味俱全!! 巧 sweet ^^

初四應邀去朋友屋企拜年, 成班青年人一齊打機最開心

Switch 既 party game 真係幾好玩

天光玩到天黑! 成班玩 over cook 嘈到拆天!

多謝黃宅熱情招呼, 有番新年開心熱鬧既氣氛 ^^

N 年前的我們 XD

初五去驗眼, 尋晚玩到 11:XX 先走今朝瞓到自然醒好爽之際, 突然醒起 1:30 pm 要出去驗眼! 嚇到午餐都唔得閒食就即刻出街, 好在及時趕到, 仲遇到一個非常非常細心既女視光師 (記住佢姓鄭), 佢同小慈小明驗得好詳細, 用既工具同手法都係第一次見, 重重覆覆問幾次又叫佢地用 D 力睇清楚, 見到一粒字都好, 佢話驗清楚 D 驗真 D, 特別係小慈近視淺, 驗深左就冇得返轉頭!

小慈而家右眼 100 度左眼 125 度, 小明左右眼都係 500 度, 半年增幅少過 50 度都叫理想, 知道我地滴緊 0.05% 眼藥水叫我地觀察半年, 可以加埋矯正近視眼鏡雙管齊下效果會更加好, 比喻好似人想身體健康, 除左做運動可以加埋食維他命補充劑一樣, 冇抵觸的! 真係好好人啊, 我忍唔住讚佢! 希望下次覆診可以見到佢 :)

驗完眼都 3:00 pm 係時間食下午茶, 2 人限聚下阿媽我要坐埋一邊