第 2 個網上婚禮

肺炎歷時超過一年, 到而家都仲係 2 人限聚令, 口罩令, 晚市禁堂食, 婚禮不多於 20 人等...  婚禮咁開心梗係想多 D 人熱熱鬧鬧, 可以延期的話正常都一定延期, 所以今日仲可以舉行既婚禮真係要有超凡無比既勇氣!!  我地今日網上參與文慧姐姐既結婚大日子喇~ 

文慧姐姐係教會湊大小慈小明, 能夠見證你步入人生新階段真係好開心 ^^

今日由剛剛結婚半年既進殷哥哥做 MC, 直播中

禮成!!  新人戴左透明口罩, 淨係親吻先除, 好有型又聰明呀!

恭喜何馬!  恭喜文慧!  

我好鍾意佢地呢張相!!  不管天陰天晴日出日落, 彼此拖手共行人生路!

祝福你地白頭到老, 永不分離!!

考試

由知道考試範圍開始, 聖誕假期已經日日溫書, 跟住考試延期兩個星期, 第一次有咁充裕既時間去溫習, 足足一個月啊!  不過網課真係唔好, 佢地好多書都好似冇聽過冇學過咁, 全部靠爸爸口述一次先有 D 印象!  學校本來都有 pass paper 俾大家溫習, 但考試範圍唔同好多 paper 都用唔到, 中史歷史地理仲要冇 pass paper!  估唔到我要重操故業出試卷俾弟弟, 令本來甩左既惡夢又翻返黎....

好在佢地都好乖, 叫溫書就溫書

有位小朋友著左我件外套不停話有媽媽味, 仲話香過被被枕頭 :DDDD

小慈的溫書陣!  攤晒成個枱面, 再加杯靚茶, 醒晒!

考試延後兩個星期不過繼續朝朝網課, 有 D 老師同佢地溫書, 不過有 D 竟然係教下學期課程, 完全同考試無關!  有 D 仲好笑, 竟然要求 2 日內騰 4 篇文, 作文又要寫大綱呢 D 咁浪費時間既功課, 點解唔將佢地變成假期功課呢?  要學生考試前交係 for 你自己假期批改嗎?  真係好想出聲... 死忍爛忍.....  今次 WFH 我同爸爸都付出晒所有時間同仿似一張白紙既佢地溫書, 真係唔得呀呢種學習模式!!

呢張相係弟弟早會領禱, 為同學們考試禱告!  乖呀!  代禱都係事奉既一種, 今次真係要切切禱告先攪得掂!

溫習有時, 玩樂有時, 呢位小朋友忽然搵番晒 D 磁石珠黎玩

又話自己肥要踏單車, 2-3 分鐘已經聽到佢氣喘... 笑瓜我了 XD

小慈家姐夠鐘去補課, 見大家都溫得 7788 就獎勵佢地出去食個下午茶叉下電!  麥當當新出左呢款杯蓋可以唔駛再插飲管, 幾好喎, 連奶昔都可以直接飲, very good!

依~  竟然開左間新超級市場

有位男子望到個凍肉櫃, 雙眼即時發光!!

好, 叉完電又繼續溫書啦!!  兩個星期考試眨眼就過, 農曆年假就可以盡情放鬆架喇!!!  撐住!

天台漫步

月頭凍左一陣, 事隔兩個星期, 日日 17-20 度著晒短衫短褲仲開埋風扇, 原來, 個冬天已經完左 @.@

真係好熱, 連 Jimmy 都已經冬眠完眼仔碌碌!  趁有太陽暖暖地咁舒服, 帶佢上天台曬下太陽先~

小明哥哥守候住, 如果唔係怕屋企附近勁多雀仔會蝦佢, 真係想將 Jimmy 放上天台養

曬左一陣就開始周圍爬, Jimmy 眼仔碌碌好可愛

漫步叢林中

點會會揀最吉既蘆薈黎休息呢?  成個身放晒上去咁放鬆, 仲識望鏡頭, 唔痛咩???!

卡住了......  Jimmy 真係好傻 XD

我地原本可以收成第 3 次既生菜受到大量雀仔既青睞, 去蕪存菁, 弟弟差 D 喊左出黎 V___V   好在都仲有少少剩, 爸爸放左幾隻 CD 上去閃爆佢地既眼, 希望佢地唔會食過翻尋味, 密切保護住 D 生菜等佢地再生過啦

我地棵菠蘿越生越茁壯!!  係原先既莖上再生一枝不特止, 仲係旁邊生多左隻小菠蘿, 真係超級得意!!  泥面佈滿青苔可能係關鍵 ^^

玩左個幾鐘, Jimmy 需要瞓番個晏覺叉叉電 :)

同弟弟一樣大既 Jimmy 不知不覺都已經 12 歲, 呢張相太經典要再 post, 佢而家已經大到唔可以再用手板托住, 我隻手都唔夠佢塊底板咁大

要繼續健壯成長啊 ^^

冬季校服

小明升中一, 夏季校服著左兩個月, 冬季校服買左完全未著過!  有誰想到第 4 波會死極都死唔去先得架...

上學期考試一改再改, 教育局亦開綠燈俾學生返學校考試, 人數不超過全校 1/6, 即係分級返去考試!  而家安排小慈日日上午返學校, 小明就隔日下午返去, 每次考兩科, 今日就返學校攞番 D 功課測驗卷等物資預備考試, 終於有機會著冬季校服喇!!!  完全唔識打呔, 好在爸爸係屋企咋!

明明套校服係度身買既, 點解褲腳長咁多褲鈕又差 D 扣唔到既呢?

郭恩明好靚仔好靚仔..... 郭恩明好靚仔好靚仔 :DDDD

型!

即刻大個左好多!  影相仲識雙手插袋

等媽媽又送你去搭車啦

嗌肚餓既小朋友仲有錫到你燶既家姐煮炒蛋俾你食, 太愛你了!  

已經 foreseen 到套冬季校服應該著唔到兩年....

凍

跨年既時候凍左 3 日, 暖幾日又再凍過, 仲要凍足成個星期!  日光白白坐係屋企都籐籐震, 竟然要搵番 D 暖水袋出黎救命!  我仲諗住唔出街冇事, 秋秋一句: 而家屋企都係得 10 度同街差不多.... 又岩喎!  呢兩個迷你暖水袋用黎暖手剛剛好, 你睇小慈小明幾開心

天氣越凍就越想食野, 一不離二, 我個廚神老公又煮沙嗲牛通俾我食喇!!  終於戒完口既小慈小明都有份 :D

今晚加餸.... 知唔知係咩?  要煮兩日, 完全係心機菜黎架

無錯!  就係鎮江餚肉!  係咪好勁呢?  廚神並唔係浪得虛名 ^^

層次分明, 入口彈牙, 真係好好食架!

工人姐姐都係佢既能力範圍內整左好多好靚又好食既午餐俾小慈小明

凍~  凍到我怕 Jimmy 病!  佢又唔冬眠喎, 瞓下醒下咁, 一趁佢醒左又有太陽我就會俾佢曬下

Jimmy 個樣好 enjoy 下架

不過有位少年人就因為飲水太少而病左!  痛苦幾日又發燒, 要食抗生素

凍, 最岩就係呢係屋企玩下遊戲刺激自己

呢個 board game 考反應砌番相同表情, 兩姐弟反應都超快

兩隻野仲發現到有新 game 逼我同秋秋一齊裝, 話一家人一齊玩開心 D 喎

係好耐冇玩既餐廳遊戲, 以貓為骨幹做餐廳員工, 仲有其他動物係客人, 都好有趣

你睇我間餐廳幾旺場!

解鎖唔同既客人, 佢地會自己一齊包場食飯, 完全係物以類聚, 好好笑!!

凍足一個星期!!

希望快 D 回暖啦!  凍到周身骨痛胃口大增, 好大件事架!