遠近慈明: 弟弟的10 歲生日

郭小明不經不覺就已經 10 歲, 第一個雙位數字既生日!! 成日叫佢做恩明 B, 係我眼中佢都仲係好細個, 係我地既心肝寶貝!! 為左令我個仔開心, 我好早已經開始為佢既生日預備, 諗好多方法同佢慶祝!! 買既禮物連同慶祝既節目, 前前後後有十樣咁多架, 務求令到非常好記性既乖仔畢生難忘 :DDDD

生日咭係其中一份禮物, 平時我地唔送架, 見你 10 歲先寫俾你啦, 張咭係小慈家姐揀既呢 ^^

仲有三位神秘嘉賓簽名 :DDDD

10 歲既驚喜生日禮物之一係做左封面男主角!!!

跳繩班既老師揀左佢個嘜頭做手冊封面, 所有學員都有一本, 超榮幸又開心呀!

仲有做左 2019 年年曆咭, 但小明話 12月先派喎, 太早派 D 朋友會唔見晒 :DD

Pre-Birthday Party! 今日皇恩浩蕩咁唔駛小明去補習, 俾佢返教會團契開生日 party, 之後仲突然話俾佢聽唔返屋企, 直接去美麗姨姨屋企玩, 開心到癲左啦!! 將軍鍾意食大紅花葉真係好得意呀!!

一入屋第一件事就係叫美麗姨姨開 Wii 俾佢地玩, 小朋友實在太好記性! 好在部機仲健在.....

玩晒所有球類運動, 玩到成身汗 :D

出完一身汗梗係要食番 D 野補充體力啦, 我地今晚食蒸海鮮, 親自去恆安街市入貨, 又平又新鮮! 仲有第一次食蒸既靚牛肉, 蒸 2 分鐘就食得, 小慈話好有牛味呀!!

仲食到 Peter 叔叔炒既黑胡椒蟹, 真係幾時食都咁好味! 美麗姨姨買左個蛋糕同小明慶祝生日, 用火熗點蠟燭真係笑爆嘴! 好多謝你地咁愛錫小明呀!

婷婷姐姐返黎, 梗係要影大合照啦! 佢而家係小慈既主日學導師, 小慈成晚問住婷婷姐姐幾時返, 又話佢叻識作曲, 兩姐弟成日係屋企唱《世代中的光線》呢 ^^

面書最好既一個功能就係 look back, 美麗姨姨 post 番呢張 9 年前既相, 9 年前既呢個時候我地又係約埋一齊食飯, 梗係要影番幅當年今日!

9 年前, 9 年後! 小明大個左好多, 我同婷婷肥左少少之外冇咩點變, 超勁!!

2018 年 11 月 25 日(星期日), 小明 10 歲仔喇!!! 我一早起身擺晒成枱都係生日禮物, 仲打算俾 10 個 birthday kiss 叫佢起身添, 點知佢太興奮自己醒左唔駛我叫, 未擦牙未洗面就衝左出黎, 難掩心急之情

除左枱面呢幾份, 我之前已經送左一副好貴既眼鏡, 又送左 Lego 恐龍, 又送左全套福爾摩斯漫畫同埋變聲器俾佢, 前後有 7 份禮物咁多, 加埋今日 3 項節目, total 10!! 十全十美啦!

小慈四年級既時候又係突然間迷上福爾摩斯, 但我都只係買左幾本俾佢, 弟弟唔知幾時開始攞左小慈家姐 D 書黎睇, 碎碎唸咁話冇左幾本, 仲話個幾本係最好睇云云.... 於是我神神秘秘咁上網同佢訂齊全套, 佢唔知架, 所以收到包裹時佢係超級驚喜的!!

何其壯觀~~~

呢塊 LCD Writing Tablet 係 Joey 姨姨送架, 仲寫埋字係上面, 小明感動到就算想玩 tablet 都唔捨得 delete D 字! 乖既小朋友係好抵錫既~

今日預備左 3 樣節目, 爸爸即刻大聲講出呢 3 項節目係「返教會、食飯同埋返屋企」, 激到小明反白眼「喂呀」咁, 笑死我喇!!!

當守主日, 生日正日在星期日梗係更加要返教會親近神啦, 我聯絡左兒童崇拜負責人曦曦哥哥, 在崇拜前為小明開一個小小生日會, 仲一早去攞蛋糕同埋泵氣球, 之後約埋爸爸同小慈家姐落黎同你一齊慶祝, 係唔係好驚喜先?!