生日咭係其中一份禮物, 平時我地唔送架, 見你 10 歲先寫俾你啦, 張咭係小慈家姐揀既呢 ^^
仲有三位神秘嘉賓簽名 :DDDD
10 歲既驚喜生日禮物之一係做左封面男主角!!!
跳繩班既老師揀左佢個嘜頭做手冊封面, 所有學員都有一本, 超榮幸又開心呀!
仲有做左 2019 年年曆咭, 但小明話 12月先派喎, 太早派 D 朋友會唔見晒 :DD
Pre-Birthday Party! 今日皇恩浩蕩咁唔駛小明去補習, 俾佢返教會團契開生日 party, 之後仲突然話俾佢聽唔返屋企, 直接去美麗姨姨屋企玩, 開心到癲左啦!! 將軍鍾意食大紅花葉真係好得意呀!!
一入屋第一件事就係叫美麗姨姨開 Wii 俾佢地玩, 小朋友實在太好記性! 好在部機仲健在.....
玩晒所有球類運動, 玩到成身汗 :D
出完一身汗梗係要食番 D 野補充體力啦, 我地今晚食蒸海鮮, 親自去恆安街市入貨, 又平又新鮮! 仲有第一次食蒸既靚牛肉, 蒸 2 分鐘就食得, 小慈話好有牛味呀!!
仲食到 Peter 叔叔炒既黑胡椒蟹, 真係幾時食都咁好味! 美麗姨姨買左個蛋糕同小明慶祝生日, 用火熗點蠟燭真係笑爆嘴! 好多謝你地咁愛錫小明呀!
婷婷姐姐返黎, 梗係要影大合照啦! 佢而家係小慈既主日學導師, 小慈成晚問住婷婷姐姐幾時返, 又話佢叻識作曲, 兩姐弟成日係屋企唱《世代中的光線》呢 ^^
面書最好既一個功能就係 look back, 美麗姨姨 post 番呢張 9 年前既相, 9 年前既呢個時候我地又係約埋一齊食飯, 梗係要影番幅當年今日!
9 年前, 9 年後! 小明大個左好多, 我同婷婷肥左少少之外冇咩點變, 超勁!!
小慈四年級既時候又係突然間迷上福爾摩斯, 但我都只係買左幾本俾佢, 弟弟唔知幾時開始攞左小慈家姐 D 書黎睇, 碎碎唸咁話冇左幾本, 仲話個幾本係最好睇云云.... 於是我神神秘秘咁上網同佢訂齊全套, 佢唔知架, 所以收到包裹時佢係超級驚喜的!!
何其壯觀~~~
呢塊 LCD Writing Tablet 係 Joey 姨姨送架, 仲寫埋字係上面, 小明感動到就算想玩 tablet 都唔捨得 delete D 字! 乖既小朋友係好抵錫既~
今日預備左 3 樣節目, 爸爸即刻大聲講出呢 3 項節目係 「返教會、食飯 同埋 返屋企」, 激到小明反白眼 「喂呀」 咁, 笑死我喇!!!
當守主日, 生日正日在星期日梗係更加要返教會親近神啦, 我聯絡左兒童崇拜負責人曦曦哥哥, 在崇拜前為小明開一個小小生日會, 仲一早去攞蛋糕同埋泵氣球, 之後約埋爸爸同小慈家姐落黎同你一齊慶祝, 係唔係好驚喜先?!
多謝曦曦哥哥同一班小朋友唱生日歌俾小明聽 :)
天有不測之風雲, 本來我打算完左崇拜快食個 lunch 就去九龍寨城公園踩單車, 點知落勁大雨, 小明即刻 down 晒, 不過我地提摩太團一呼百應即慶一齊食飯同小明慶祝生日! 好驚喜呢! 一齊在線打機即刻開心番 :DDD
生日咖哩包蓋, 笑 C 街坊
小明 Happy Happy 10th Birthday!!!
食完飯竟然停左雨!! 縱使路面濕淋淋, 但兩姐弟依然好想去踩單車, 咁就去啦!! 點知揀架車出去試踩一個圈又開始落大雨, 真係冇計, 唯有放棄計畫返屋企休息一陣間啦! 免費踩左公園一個圈, 賺左 :P
生日 Dinner, 小慈家姐一話去一間弟弟想去左好耐既餐廳食飯, 弟弟已經即刻諗到係貓貓餐廳, 可想而知佢真係好想去呢 ^^ 一進場已經有兩隻貓瞓左係我地張枱, 超級開心!
更驚喜既係, 小明唔知我仲約埋爺爺姑媽姑丈昊昊一齊慶祝, 不過佢話我地張枱咁大佢已經估到
呢度 D 貓全部都食得架.... 我指佢地既名 :D 例如瞓係我地張枱瞓到我地開餐都唔醒既曲奇啦, 我抱住既洋蔥啦, 有隻叫 Oreo..... 呀! 唔係, 秋秋抱緊個隻例外, 叫大虎
驚喜環節, 每枱可以用 $18 買一罐高級貓罐頭, 罐頭一開, 全店廿幾三十隻貓即刻將你重重包圍, 場面何其震撼!!!
餵我啦! 餵我啦! 群情洶湧
弟弟, 你有好多人錫你, 個個都愛你希望你開心, 你要做個愛神愛人既好孩子呀!
Happy Happy Birthday my lovely Young Man! We all love you very very much!!!
