大作

無咩幾何見到小明正經畫畫, 自從唔肯再學畫之後, 而家只會見到佢畫東畫西, 呢幅係叮噹百寶說明圖 , 可能只有佢自己先睇得明

我今日真係好驚喜, 學校派番弟弟兩幅大作, 依~~  有意景喎幅日落 ^^

呢幅馬賽克仲攞左隻 A 添

驚喜唔係成日有, 我欣賞佢做手作仔多 D, 近來愛上 Lego, 不停砌動物款, 爸爸又同佢一齊玩, 上網搵圖樣跟住砌, 好得意呀 ^^

弟弟今日砌架餐車我真係覺得好靚, 警察休息加油站, 有廚師煮雞脾  :D

真係好攪笑架佢 ^^

月會主席 & 書記

返左城潮浸已經就黎 7 年, 我地每個月都會有月會商討教會大大小小既事項, 全教會一齊參與, 一齊議決.  咁要開會, 當然就要有主席主持會議, 同埋要書記負責記錄啦!  今日, 我同秋秋十分榮幸被推選成為 2016 年 11月份月會主席同埋書記 ^^

呢本極具價值既月會記錄, 憑佢既外型就知佢歷史悠久, 要小心輕放

企上個台度真係好驚, 心跳加速紅都面晒 :D

今日決議事項唔係太多, 我都讀得頗流利, 秋秋個主席祈禱帶得好好架!

感謝神讓我地體驗左我地既第一次 ^^

砌聖誕樹

教會邀請兩個家庭幫手佈置聖誕樹, 今年我地被點名幫手, 真係好榮幸呀!!!

另一個家庭就係我地好 friend 既團友仔 Keynes 叔叔一家 ^^

開工喇~~  開工喇~~  小慈小明好興奮, 出世到而家都未試過佈置聖誕樹, 一係唔砌, 一砌就砌咁巨型既樹, 真係好開心呀!

爬到咁高, 小心 D 呀!!

我話呢 D 叫 Disco 波, 望到就想跳舞 :D

掛裝飾物, 繞繩, 亮燈, 人多好辦事, 話咁快就大功告成!!

自己砌既點都話靚 ^^

聖誕係最開心既節日!

8 歲仔

現今科技真係好發達, 一開電話就收到通知今日係我個乖仔既生日, 仲有大量當年今日既 look back, 小明自己又係日曆度畫晒圖畫寫明今日生日, 好難唔記得囉 >v<

3 歲 4 歲 5 歲 6 歲 7 歲.... 今日 8 歲喇!!  小明細個真係好得意 ^^

我仲擦緊牙, 小慈就已經入房搵我問弟弟生日, 今日有咩安排呀?  呢個愛錫細佬既家姐仲緊張過壽星仔!!  於是我唱住生日歌咁同我個乖仔講骨摸靈, 小明個樣霖晒, 問:「我係唔係可以好似小慈家姐咁朝早收左一份禮物先, 放學返黎就有第二份咁呀?」你咁都記得?!!  你又知你一定有兩份禮物??  哈哈哈~~~~  好在我真係有準備!  一份爸爸送既, 一份媽媽送既, 你想收邊份先?  於是, 一見到爸爸送左一套 8 隻既 Lego 恐龍, 開心到癲左!!!

「Yeah!!!!!  爸爸真係買到呀!!  我好鍾意呀!!!!」

趕住出門口返學, 否則小明即場拆晒 8 隻出黎玩啦!  幾唔願意出門口, 利誘佢媽媽送返學先爽手 D 咋 :)

知仔莫若父母, 既然小明都知佢有超過一份禮物, 我地就決定曬冷!!  更何況我地初初預備左兩份禮物, 後來爸爸搵到恐龍又買, 仲一次過買晒 16 款, 做成今日成枱都係玩具既震撼畫面!  小明放學一返黎見到, 完全係呆左唔識反應 :D

終於俾佢拆晒 ^^

小明勁鍾意恐龍, 小慈反而對我送既兩份禮物仲大興趣, 早知 keep 起佢留番小慈生日送啦 (小明幾大聲反對呀 @.@)

班主任仲非常識做, 全班一齊唱生日歌俾小明聽, 又係佢手冊度寫幾隻字, 氹到小明好開心 :)

為隆重其事, 熱烈慶祝小明弟弟生日, 媽媽 cancel 晒所有課外活動, 兩姐弟又合作一早做晒功課, 放學返屋企拆完禮物就出去食 early dinner, 第一次食呢間出名又平又靚又正又鮮既粥底火鍋

好有趣, 真係冇諗過用粥黎打邊爐, 佢其實係粥水, D 米撈起晒, 打完海鮮邊爐個粥膽吸晒海鮮鮮味先再放米煮粥, 超好食啊~~~

老闆千叮萬囑一定要用鉗捉實 D 蝦, 因為真係新鮮到跳來跳去, 鮑魚又郁郁下, 蟹又爆羔, 真係好好好好味呀!!!

雖然飽到上心口, 唱生日歌吹蠟燭許願係一定要既!

玩到 10 點都唔捨得瞓我就知呢位壽星仔開心得好緊要啦!

爺爺姑媽姑丈送玩具同大利是

仲要多謝 Keynes 叔叔既驚喜生日禮物 (放係樹底真係好攪笑!!)

生日快樂, 身體健康, 恩典滿滿!  Happy Happy Birthday, 小明 B  (^8^)  We love you~~~~

小明的 8 歲生日

小明一直都非常天馬行空好有主見, 記性仲好得人驚添, 越大就越有性格, 唔係下下都聽你點, 咁其實好好玩, 好鍾意整古佢, 佢又有反應先正 ^^

就黎生日, 小明問我:「生日點同我慶祝呀, 媽媽?」「下?  我咁辛苦生你出黎, 唔係你同我慶祝咩?」「依~~~  唔係呀, 我生日係星期五要返學冇得去玩, 我想去南丫島慶祝生日呀!」「南丫島?  點解想去呢度既?」「上次我發燒冇得同小慈家姐班朋友玩, 今次我想去番呀!」 我真係呆左幾秒, 唔係講笑!  我地班爆炸 BB 由半歲開始一齊過生日, 8 歲生日我地就係去左南丫島食海鮮行山玩沙灘, 出發前弟弟勁咳仲發埋燒, 梗係行唔到山啦, 為免佢唔開心, 爸爸專登留係屋企陪佢放棄鍾意食既海鮮, 所以得我同小慈兩個去, 真係估唔到弟弟記足 2 年幾 @.@  參考網誌 click ==> 南丫島

好啦!  見係你生日又獎勵你咁好記性, 媽媽排除萬難終於度到個期同你去南丫島暢玩一日!  今次決定同上次行程倒轉, 由中環搭船入榕樹灣, 滿足弟弟去洪勝爺灘玩完沙先行去索罟灣 :)

仲諗住係大船可以食埋杯麵, 點知係渡輪, 都好, 半個鐘多少少就入到去

到喇!  到喇!  今日天氣好到不得了呀!!  幾耐冇見過太陽 :)

南丫島實在有好多特色小店, 可惜心急既小明只係肯行貓 shop, 我地快速食完個茶餐廳 lunch 就去沙灘放電喇~~~~~~

好靚好靚!  今日有太陽但唔曬, 有風又唔熱, 海水凍但完全唔會防礙玩沙 ^^

我好鍾意呢張相 ^^

玩左兩個幾鐘沙灘梗係唔夠皮啦!  但我地要預番時間行去索罟灣, 天黑就行唔到山架喇!  大人行預算 50 分鐘, 呢兩隻鴨仔行得慢, 爸爸又講解下整個導賞團咁, 至少都個幾鐘啦, 係時候起程!

搵左個好專業既姐姐幫我地影左張日落全家幅 ^^

行山, 點可以唔食孖條  :D

搵到香港特有物種, 盧文氏樹蛙.... 既產地 :p  咁大個洞, 爸爸陪弟弟去探險, 一照燈見到青蛙, 仲有勁多..... 蚊  >.<

呢度都有個紅樹林!  爸爸帶晒小慈小明落去近距離觀察, 仲捉到蟹仔!  小明開心到不得了, 即刻係褲袋攞個小的塔糖盒出黎裝住隻蟹 @.@  估唔到小明有備而來, 呢隻仔真係正!

行完山肚餓, 係時候食美味海鮮餐, 椒鹽超級大瀨尿蝦真係好好味, yummy!!

偶遇狗 BB Mocha, 一叫佢識望鏡頭, 好得意呀!

餐廳有船載我地出番中環 or 尖沙咀, 超正!  仲係夢寐以求有大飛 feel 既船, 識得坐一定坐上層吹海風啦!  我地搭 8:00 p.m. 船, 順路經過迪士尼仲睇埋煙花添, 超值呀!

8 歲既小明真係好鬼馬, 表情多多真係笑瓜我地 :D

生日願望實現了, 係唔係好開心先!!

上報紙

學校武術隊出左個世界冠軍, 即刻好多報紙雜誌來訪問, 連帶小明都沾光上報紙呀 ^^

東方日報既訪問 --> click  oriental daily

小慈家姐影左弟弟個大頭 :)  問弟弟做咩唔笑既?  小明話師傅要佢地型 D, 忍住唔好笑架  :D

拍攝花絮

港產最年輕既世界冠軍, 每個星期要練 6 日功夫, 每次最少三小時仲要操體能 - sit up 500 下, 紥馬 5 分鐘.... 少 D 意志都唔得, 真係唔容易架!

一班師弟師妹都非常高興!

繼續努力練武!

一人火鍋

好想食糯米飯, 竟然快餐店有供應, 仲有飯焦煲仔飯食添!  又唔貴, 駛咩自己煮咁辛苦呢?  於是今晚出去幫襯, 點知小慈小明見完幅圖就話唔想食煲仔飯!?  下?!  一場黎到咁點算呀?  小慈叫我揀俾佢, 咁我話買煲仔飯啦, 佢又話唔好, 想點先?  於是我叫佢看圖識字想食咩指俾我睇.... 於是佢同弟弟兩個同心合意地指住個邊爐話好吸引!  世事既野往往真係估你唔到, 落差太大, anyway, 我地第一次係快餐店打邊爐喇~~

今時唔同往日, 而家快餐店竟然有專人送餐服務!!  真係驚喜, 買完飛坐定定就有得食 :)  以前一個人食飯先慘呀, 經常自己捧住個餐搵位, 有時仲要爭, 行快步個盆上面杯凍檸茶就會倒瀉, 碟火腿沙律成碟跣左落地都有試過 >_<

叫左兩個火鍋, 追加兩碟牛肉, 小明仲自己剔左要午餐肉同埋公仔麵, 結果, 個公仔麵佢地係生食架!!!

呢餐真係好抵, 飽到上心口叫埋餐飲都唔駛 $200 ^^