一人火鍋

好想食糯米飯, 竟然快餐店有供應, 仲有飯焦煲仔飯食添!  又唔貴, 駛咩自己煮咁辛苦呢?  於是今晚出去幫襯, 點知小慈小明見完幅圖就話唔想食煲仔飯!?  下?!  一場黎到咁點算呀?  小慈叫我揀俾佢, 咁我話買煲仔飯啦, 佢又話唔好, 想點先?  於是我叫佢看圖識字想食咩指俾我睇.... 於是佢同弟弟兩個同心合意地指住個邊爐話好吸引!  世事既野往往真係估你唔到, 落差太大, anyway, 我地第一次係快餐店打邊爐喇~~

今時唔同往日, 而家快餐店竟然有專人送餐服務!!  真係驚喜, 買完飛坐定定就有得食 :)  以前一個人食飯先慘呀, 經常自己捧住個餐搵位, 有時仲要爭, 行快步個盆上面杯凍檸茶就會倒瀉, 碟火腿沙律成碟跣左落地都有試過 >_<

叫左兩個火鍋, 追加兩碟牛肉, 小明仲自己剔左要午餐肉同埋公仔麵, 結果, 個公仔麵佢地係生食架!!!

呢餐真係好抵, 飽到上心口叫埋餐飲都唔駛 $200 ^^