遠近慈明: 10月 2016

2016年10月30日星期日

捉蟹仔

今個暑假非常忙碌冇機會去沙灘, 爸爸話復活節去沙巴已經當玩左沙灘架喇! 點知弟弟念念不忘, 成日問仲有冇得去? 都已經 10 月尾天氣開始凍難度真係好高噃....

測完驗今個星期日竟然冇野做, 我忽發奇想唔知可唔可以去捉蟹仔呢? 於是叫秋秋即刻 check 潮汐漲退時間係 2:50 pm 嘩~ Perfect! 我地返完崇拜再返屋企攞架生就岩岩好! Yeah, 出發!! 一年一度白石之旅, 開始~~~

今日天氣非常好, 有陽光, 海水又唔凍, 好正呀!

小慈好努力掘引水道, 爸爸話水道夠大的話可以利用潮漲困住魚仔

弟弟主力捉蟹, 張蟹仔分類：和尚蟹一堆、小蟹一堆, 又將摌仔埋葬扮石中神劍, 玩到水浸臀股都唔發覺, 樂不可支

收獲豐富

魚都搵到一條, 不過已經反肚

最好笑個個係爸爸, 自創即開生蠔, 佢真係食架....... @.@

潮退好短, 潮漲好快, 小慈小明玩到走投無路先肯走, 彎身掘蟹玩左兩個鐘起身先覺腰骨痛 @.@ 夜晚幫襯明星海鮮舫, 大嘆芝士焗龍蝦慶祝媽媽有 back pay ^^

Happy Day :)

2016年10月28日星期五

父子兵

究竟係現今既科技太人性化易掌控, 定係新一代既小朋友智商高左? 我真係冇估到未夠 8 歲既小明已經可以同爸爸一齊打機!!

佢地玩既遊戲叫 diep.io 屬於對戰遊戲, 同色既一隊去打敗對手, 唔死就升 level 裝備越勁又可以變身之類, 我都唔識玩

online game, 組埋同一隊一齊玩都需要 D 運氣, 父子同場, 爸爸叫 Kwok, 弟弟叫 ymkwok

我絕對相信打機係遺傳既!

2016年10月24日星期一

3 to go

繼 8 月尾兩姐弟經典地越洋在新加坡甩牙之後, 小慈 9 月同 10 月都係一個月甩一隻牙!

小慈同我講: 「媽媽, 我估我係瞓瞓下覺甩牙! 今朝我一起身覺得個口有 D 野, 一吐就吐左隻牙出黎!! 所以我估係瞓瞓下覺甩左....」 @.@ 嚇死人咩?!! 好在冇吞左咋, 如果唔係哽塞魂斷夢中就真係大件事!

甩下甩下, 20 隻 BB 牙已經甩左 17 隻, 仲差左上顎犬齒同埋下顎兩隻大牙就甩晒喇! 通常都係有恆齒出世先頂鬆 D BB 牙, 乳齒同恆齒相比真係好似大人同小朋友既分別, 好大隻, 我真係好希望小慈個口仔夠位生, 遲 D 要再睇箍牙醫生問意見先

好耐之前買定牙仔盒就係為左幫小慈小明儲起晒佢地 D 牙仔, 一目了言, 而家小慈仲欠 3 個洞洞就儲齊一套換閃咭 ^^

3 to go!!! 無晒 BB 牙就係新階段既開始!!

2016年10月22日星期六

生日

十月, 家族入面有兩位男士生日, 昊昊表弟都 10 歲喇! 開始唔識買生日禮物俾呢班中童, 唯有俾利是等佢自己想買咩就買咩啦! 行街見到呢幾隻 massage hammer 好攪笑, 一人送一隻俾佢地, 又出奇地鍾意喎~

一個星期見一次既家庭聚會, 我好鍾意見到佢地玩到攬頭攬頸架 ^^

小慈就好鍾意預備小遊戲俾大家玩

Ta Da~~ 愛錫細佬既家姐預早送上驚喜生日蛋糕

芒果係秋秋既至愛~~

Happy Birthday to 爸爸~~

爸爸既爸爸送利是

一家人一齊點都係開心 :)

22 號就係爸爸既正日生日, 我地一家四口一齊食餐好野, 就幫襯新開張既韓燒餐廳

小慈小明最鍾意食自助餐因為自己鍾意食咩就可以攞黎食, 又可以名正言順走黎走去梗開心啦! 繼每次自助餐小明都一定食一碟白飯之後, 今次任食韓燒, 小明係飲左 3 碗湯、1 碗碗仔翅同一碟薯條, 再食多少少肉就同我講好飽..... 真係抵養又識食

小慈就好喜歡做廚師, 不停話好好玩

夜晚就同秋秋二人世界, 呢間大閘蟹「膏瘋會」十分誇張, 要早一個月訂枱仲要預早俾晒錢, 尋日仲打 8 號風球, 好在個風黎得快亦走得快, 今日出晒大太陽, 否則秋秋話橫風橫雨但俾左錢要焗住黎食既感覺差咁一截啦! Anyway, D 蟹好好味, service 又好, 抵間餐廳咁麻煩都全場爆滿啦! 不過我地食力都真係麻麻, 每款蟹叫做試過晒, 食左 7 隻就飽到上心口, 所以小慈小明食少少野就叫飽我地都冇話佢地, 實在太似, 一家人呀 >v<

返到屋企見到好 sweet 既仔女留言, 霖晒~

生日快樂呀, 老公!!! We love you!!

2016年10月3日星期一

靠自己

弟弟已經三年班, 犯了一般男孩的通病 -- 求其是但! 爸爸話我越扶越墜, 令弟弟變得太依賴, 於是我都開始放手

9 月一開學我已經講左除左簽手冊, 我唔睇功課架喇, 點知小慈竟然求情: 「一個星期啦, 媽媽! 幫我地一個星期啦!」好啦, 就俾一個星期寬限期

結果, 欠功課暫時冇, 不過評分就極差, 字體欠端正呀, Mind your hand writing, 「丙」都有出現......... 係小慈呀 @.@ 目瞪口呆, 四年來小慈極少丙, 係極少功課出現丙...... 唉, 我相信係轉晒新老師要求唔同晒, 仲有新學年嚴厲整頓規則之故, 而家 D 中文字我都唔夠膽教小慈寫, 原來自己一直都寫錯! 舉例如告訴個告字, 寫左幾十年都唔穿底, 連電腦字都冇穿啦, but 老師係教「牛口」告 -__________- 英文功課又係, 全用原子筆 and 全寫潦草, 幾隻字冇掂線份功課已經 C...... 唯有叫小慈留心 D, 聽實老師點教啦!

反而弟弟冇咩野喎, 個衰仔靠好記性, 就算手冊冇寫都知自己要做咩功課, 暫時功課表現中規中矩, 目標只係唔好俾老師話功課欠用心姐! 唔理佢, 反而俾左個驚喜我, 今日放學返黎鞋都未除就打電話俾我, 話老師讚佢呀~~

份功課自己做, 我一隻字都冇改過, 老師又俾甲-, 又吸印仔, 又送獎勵劵, 仲親筆寫字鼓勵, 弟弟開心得好緊要呀!