摸蜆

舊年既呢個時候, 唔想同人逼但又想出街玩, 我地去左一個人少少既石灘玩得好開心!  今日夾岩潮退時間同石灘重聚, 點知呢度已經人頭湧湧, 識貨既人真係唔少, 大家一齊玩啦!  三父子女帶齊裝備, 出發~~

小明自在到好似返左屋企咁, 自把自為行到舞雷公咁遠仲連鞋都除埋!  石灘黎架呀仔, 蠔殼割腳呀!!!

小慈就周圍追蟹仔

爸爸呢度摸摸, 個度掘掘

有大發現呀!!!

史無前例掘到好大隻蜆

大蜆鍾意呢埋係山澗水流過既地方, 仲鍾意打直插係沙入面, 喜歡聚居既佢地掘到一隻就代表附近有好多

好易掘, 小慈小明都黎幫手

呢位小朋友企係度掘蜆, 潮漲話黎就黎, 沙石話咁快活埋腳仔, 一縮腳連鞋都冇埋, 點摸都搵唔番......  於是, 唯有用膠袋頂住先

小慈家姐一步一步陪住佢行

俾爸爸發現左隻菊花牌, 點都強韌過個膠袋, 於是, 好似套住隻恐龍腳趾咁返屋企, 笑爆嘴!!!!

今日加餸, 太好味了!!

主日學結業禮

每逢 9 月尾就係主日學既結業禮, 一季 3 個月, 四季就一年架喇 ^^

吸晴既係台上面既禮物, 不過今日入心既係文牧師講「暗利之家」, 一個算得上係偉大既以色列王, 又遷首都去撒瑪利亞又擴大以色列版圖仲 3 代王朝添, 聖經都只係用 8 節記載佢 (參考列王記上16:21-28), 仲要最重要個一句係 -- 「暗利行耶和華眼中看為惡的事、比他以前的列王作惡更甚」..... 尊貴如一代君王即使做偉大既事但唔係神眼中看為正既, 又有何用?  返主日學, 就係要學習做神眼中看為正既事, 不可依靠自己的聰明!!

郭小明考試寫錯幾隻字, 屈居亞軍

有禮物就好開心啦

多謝惠清姨姨既教導

小慈就攞左第一名!  叻叻!  佢真係好鍾意背金句, 好喜歡聖經故事

佩思姨姨教左小慈 3 年, 多謝您!

驚喜地爸爸返主日學出席率有 8 成都有獎!  我有幾次帶左小慈小明去比賽, 咁就唔夠數了.... 嗚嗚~~

滿載而歸, 多謝天父 ^^

未返到屋企已經拆左, 超級鍾意呀!

係對戰棋黎架, 類似 master mind 好好玩

7 歲 up, 弟弟一教就識玩

返主日學學習神既話語原是基督徒既本份, 仲有禮物收真係好開心啦!

中秋節快樂

一年容易又中秋!  真係呀, 感覺岩岩先完左暑假話咁快又秋涼了.... 掃慶地, 即是好快就測驗考試  v_v

唔理咁多, 玩左先講!  今晚終於冇落雨, 可以去平台玩螢光棒了

史無前例食飯食得好快, 我們這一家竟然最早到公園

唔覺意 fing 左螢光圈上樹, 要靠高人爸爸用螢光蛇營救

觸發大家跳螢光大繩

雲層中超級大月亮出頭了

朋友在日本影的超級圓月

姑丈駛出佢既秘密武器 -- 直昇機

弟弟好鍾意個搖控器

爸爸教左兩度散手之後都掌握到

小慈對手好定, 又斯文, 控制得好好呀!

今年買左 2 盒月餅, 我食左差不多一個, 小慈小明 D 月餅引冇以前咁大, 出年可以唔駛買咁多

知唔知呢度冇左邊個果子月餅呀?..............
哈!  係冇左節制呀!  食月餅冇節制, 後果可以好嚴重 @.@

祝大家中秋節快樂~~

盪鞦韆

難得今日大家都早起身而巴士又準時, 有機會去公園玩一陣先返教會喇 ^^

家姐識既野, 弟弟通常都好快學得識

出身汗返主日學更醒神 ^^

我地今日終於遇到小靖僖返教會喇~

靖僖好乖, 係人抱都得, 差 D 想抱埋佢返屋企

靖僖 BB 對脾脾 vs 小慈對香雞手 :D

小慈唔係好敢抱, 其實我地仲驚過佢

愛上蚱猛

今日體操班放假, 弟弟即刻黐實我出太子, 問佢想去金魚街? 雀仔街? 去繽紛? 行書室?  弟弟諗都唔駛諗就話去雀仔街, 佢話要捉蚱猛!  同埋, 去雀仔街都會經過花墟又可以順便睇埋花, 佢又講得好岩喎 ^^

近來熱愛豬籠草, 見出面街靚過自己屋企個盆咁多, 旁敲側擊想我買過盆返屋企!  我話：「你唔俾機會屋企個盆豬籠草呀? 佢未死架噃, 仲好有意志生緊新豬仔, 你唔要佢拿?」講完就記得, 唔再貪新忘舊, 算你乖啦

去到雀仔街, 初時弟弟見到地下有蚱猛, 話俾店主叔叔聽, 叔叔一手捉左就想放入弟弟個衫袋, 弟弟縮後避開, 叔叔即刻鬧弟弟冇膽, 仲收埋隻蚱猛唔俾佢!  我問弟弟, 你好驚咩?  弟弟好細聲同我講:「我個袋入面有包爆炸糖, 我唔想隻蚱猛整污糟我包糖, 我都唔係驚!」果然, 轉個頭就自己捉左一隻

同隻蚱猛玩左好耐, 俾塊花瓣佢會自己抓住, 弟弟好似釣魚咁同佢玩

蹲係地下睇雀, 有另一隻蚱猛跳上弟弟膊頭, 好攪笑!  弟弟話 D 蚱猛好鍾意佢, 我話可能你著綠色衫佢地以為你係棵樹呀  :D

因為順路所以去埋繽紛, 非常有節日氣氛, 好多燈籠呀!

弟弟好鍾意呢個鴨仔燈籠

超大隻白兔燈籠

實在太開心, 弟弟話如果個個星期都可以跟我出太子就好喎!

動作獻詩

尋晚去飲攪到咁夜, 小慈今朝一聽到要獻詩就即刻彈起身!  由細到大朝早都冇「起床氣」, 呢個女真係好乖 ^8^

今日唱英文歌, 咁特別既?  用背脊出場?  唱第一句先彈番正面, 好可愛

有突破, 唱詩有動作仲有互動!  成個景象豐富晒 :)

鍾意佢地唱詩歌笑咪咪

程序表

歌詞翻譯

同指揮 Queenie 姐姐影相, 讚小慈有好強節奏感, 今次唱歌加入既動作, 好多都仲係小慈提議既添!  識跳舞又識唱歌真係好, 令到 Queenie 姐姐非常欣賞小慈

Well Done 呀, 小慈囡!!