一參加我就非常後悔, 因為要考既範圍原來極多! 總共考 4 part, (a) 生字配量詞考 10 個 及 語句分辨 10 題 (b) 朗讀 100-150 字短文 (c) 聆聽錄音回答問題 5 條 (d) 1 分鐘看圖/命題說故事
每 part 都有 10 篇範文, 隨機抽問, 即是你 100 個生字 / 100 題分辨 / 1000 字短文 / 10 篇錄音內容全部都要識 @.@ 仲有 1 分鐘說故事千萬不可以睇少, 原來好難先講到 1 分鐘, 要有非常豐富既故事內容, 講唔夠 1 分鐘係要扣分既.... 於是, 在小慈小明絕不能隨意吹水 1 分鐘既情況下, 又要同佢地一齊作定 D 故事 -- 我最喜歡的食物 / 我最喜歡的動物 / 生日禮物...... 唔知佢考邊篇, 即是 10 篇命題你又要全部記得.... 1 月尾考試, 成個聖誕假期就算返緊漳州都要背普通話, 真係足足努力左個半月! 背得好辛苦呀~~~~
不過, 努力係冇白費既!! 等左 3 個月, 今日終於有成績啦 ^^
郭小明 初級 97 分 A 等 郭小慈 中級 88 分 B 等!!!
真係好叻好叻呀!!!!
我仲諗住小明唔合格架, 因為佢話命題講佢最弱個篇「我最喜歡的季節」佢講唔夠 1 分鐘, 咁要扣好多分架麻, 聆聽佢又話唔係平時佢學個 D, 好似係考小慈家姐個 D 咁, 佢又唔係好肯定, 所以估佢凶多吉少, 點知佢竟然爆分咁滯, 100 分滿分攞 97, 光宗耀祖啦!
至於小慈就冇陰公, 淨係聆聽都冇左 8 分, 佢話完全聽唔明篇野講咩, 同平時練習唔同, 根據小明既證供, 我估聆聽係越級挑戰, 初級考中級野, 小明聽過晒小慈家姐溫習, 所以佢有印象, 小慈考高級程度, 所以真係唔識, 咁其實係好唔公平, 唔係考範圍既野俾黎做咩?! 小慈壯烈犧牲左! 不過佢咁都有 88 分都真係叻叻啦!
仲有評語, 上面係小明既, 下面係小慈
意外收獲係小明對普通話興趣大增, 自信滿滿, 仲話考試好好玩, 好想再考過喎!
沒有留言:
張貼留言