溫習

好快就要考終期試, 考完先有得開心放暑假, 不過開心之前就要經歷痛苦, 老師趕課程, 考核範圍有好多到而家都未教, 每日有大量功課, 中英文默書一浪接一浪, 仲要試前評估, 隨堂考試又開始  @.@

同我個兩隻慢世摸王溫書真係想 C, 坐唔夠 1 分鐘就離開個位, 少少聲就八卦, 寫字慢, 反應慢, 耐性零!  溫唔夠一陣就問幾時休息, 有冇得休息, 休息個時我想同你玩咩咩咩....... 唉~  完全都唔係想溫書!!  冇呀!  咩都冇呀!  休息只可以玩玩具, iPhone  iPad 絕對係考完試先准掂呀!

於是, 小明就怯怯咁問我, 休息時睇圖書得唔得?  咁乖, 梗係得啦!  不過佢要我讀  >.<

呢本 3D Rain Forest 真係幾好睇, 仲以為咁靚咁重既書不能外借, 學校又俾喎, 不過每個學生只可以借 1 次, 小明好唔捨得本書, 佢竟然諗到方法續借!!

佢小息時約埋小慈家姐去圖書館, 佢去還書, 望實個圖書館館理員, 見佢一將本書放番上書架就即刻推小慈家姐去借!!  如是者, 小明又可以睇呢本 Rain Forest 多一個星期喇!  6 歲人仔識得用呢種方法真係好聰明!  亦肯定佢平時觀察入微, 完全知道圖書館點運作, 真係好勁!  咁聰明一定要用在正途呀, 弟弟!

同佢地溫書都真係好苦悶又勞氣架, 不過間唔中都有滿足感既.  弟弟溫書好爽手, 佢記性好如果專心有耐性佢好快就溫完, 係寫字超醜樣捉佢捉到冇晒心機

今日同佢溫中文寫作, 估都估唔到佢會寫 D 咁野, 真係唔知好嬲定好笑.....

仔呀仔, 一隻小強只會出現係電視上架咋, 考試時你千奇唔好寫落份卷度呀!  真係暈 @.@