我真係冇估到記性好既弟弟, 英文默書要溫一個星期!! 真係完全入唔到腦, 5 分鐘前串識左, 隔一陣再問佢係完全好似未溫過, 未見過呢個字咁 @.@ 都知佢英文冇咁醒, 已經提早同佢溫, 點知都真係同小慈一樣, 第一次默書要用一個星期時間.....
講就天下無敵, 弟弟對住外籍老師簡直對答如流, 真係唔明一去到串字咁辛苦? 一隻 orange, 真係串到屙爛屎都攪唔掂! 當年經歷過小慈痛苦既串字階段, 而家又黎多一次... 唉... 唯有苦中作樂, 同弟弟玩下啦! 羅左盒 scrabble 出黎等佢落手落腳串生字, 果然隻屙爛屎串得快左好多
努力左一個星期, 結果都是慘痛的, 間線都攪錯晒 >.<
小慈家姐去到二年級下學期就突然大發神威, 好似被打通任督二脈咁, 自己識得拼音, 記性又突然好左, 默書平均溫 3 次就 ok! 而家小三仲犀利, 識用埋錄音自己同自己默書
真係唔錯呀, 不論成績, 自動自覺呢種態度已經好抵錫!
學習語言, 冇辦法地都係需要死記硬背, 越識得多生字, 長既字就係由好多小既生字所組成, 小慈就享受緊佢一年級死記後既成果, 弟弟你都要加油呀!
有時你會覺得特別艱難, 天父也許在給你準備驚喜 ^^
沒有留言:
張貼留言