感恩挑戰

非常多謝芝玲姐既邀請讓我在感恩挑戰中有份!  抱歉之前的生活亂作一團, 每天都是忙忙忙, 到現在才有時間整理自己!  有想過既然已經過了一段時間, 不如 "扮睇唔到" 不了了之不去接受挑戰啦!  但神的恩典未敢忘記, 於是, 連續 5 天每天感恩 3 件事, 我開始喇~~

Day 1/5 感恩:

1. 感恩我的媽媽誤打誤撞下讓我小學中學都在基督教學校讀書, 小六在宣道園畢業宿營時大受聖靈感動哭過不停, 決志相信耶穌!  當時 12 歲的我其實唔知發生咩事, 畢業後升讀的是協恩中學, 一間非常非常好的女子中學, 每天早會唱詩歌是我最快樂的時間, 中三時跟好姐妹返教會, 中四受浸, 決意一生要成為一個基督徒
2. 感恩讓我在教會拍拖 (嘻), 若不是神, 我相信我同郭長秋分手左十萬八千次!  "我們愛, 因為神先愛我們", 是我們的結婚請帖中的金句, 亦是我們婚姻關係中最重要的一句!  愛能遮掩許多的罪, 互相包容, 互相體諒
3. 感恩我有4個金蘭姐妹 Cherrie, Brenda, Wendy, Iris 中學畢業後大家各散東西, 令我們友誼永固其實都係因為神!  雖不常見, 一年 5 次慶祝大家生日, 但每次大家都有數說不盡的恩典, 讓愛飛翔!

Day 2/5:

1. 感恩我有一份非常非常穩定, 福利好及收入唔錯既工作, 可以每日 6:30 pm 返到屋企真係一件非常值得感恩既事, 尤其當你屋企有 2 個小學生等緊你返黎
2. 感恩我有一個非常好既同事, 佢大我十多年, 每次有困難佢都幫助到我因為佢經歷過晒, 非常感謝佢無私既分享分擔, 感我所感, 急我所急
3. 感恩當年一 TAKE 過考到車牌, 岩岩再續十年牌, 好感恩當年鼓起勇氣去考試, 而家應該考唔番當年既水準, 不過我仍然相信自己既駕駛技術係絕對安全既

Day 3/5:

1. 感恩我有一個性格跟我完全唔一樣既老公: 我愛動, 他好靜; 我緊張, 他從容...... 縱然不相同, 但在主內合而為一, 互補不足, 真係一件好神奇既事!
2. 感恩我有一個當我係女一樣既奶奶, 雖然佢成日都話我湊到小慈小明咁瘦, 但佢都係好錫我呢個新抱既 ^^
3. 感恩我有一對性格完全唔一樣既仔女: 小慈慢熱但細心, 經常做小手工寫字條俾我地表達愛意, 很窩心的一個女兒;  小明粗心但熱情, 經常忽發奇想做出惹笑舉動, 氹得全家上下非常開心, 超得意既一個兒仔!  最令我感謝神既係佢地非常相親相愛, 家姐錫弟弟, 弟弟錫家姐, 真係令我地做父母既心感欣慰, 為此更加感謝天父!

Day 4/5:

1. 感恩我有教會生活, 返主日學返團契返崇拜...... 不經不覺我地已經返左 4 年由友誼會友榮升成為正式會友, 我地已經係城潮浸既人喇 ^^
2. 感恩我有機會成為詩班員, 能夠唱詩讚美配得我地稱讚既天父真係好得無比!  我每次都會被詩歌歌詞所觸動, 感恩呢個世界上有音樂~
3. 感恩我既家人都係基督徒, "當信主耶穌, 你和你一家都必得救" 呢個神的應許, 我深信我老爺同我細佬都一定會相信耶穌既!

話咁快已經第 5 天了, 呢個感恩挑戰既好處真係俾你回想神在你生命裡既恩典真係多到十隻手都數唔晒 (直情係頭髮都數唔晒!)  若真係要數, 你係屋企/係街可以用電腦/用電話睇面書都係恩典; 聽朝瞓醒可以擘大眼行得走得有工返有學返有野食都係恩典黎架!  凡事謝恩, 絕對可以改變你既人生觀 ^^

Day 5/5 last:

1. 感恩我有一班大肚網媽 ^^  我地由大肚開始係 forum 度傾偈, 傾到約出黎見面, 每次見面都笑到肚痛, 傾偈傾到餐廳熄燈趕客我地都唔捨得走 ^^
2. 感恩我地呢班大肚網媽 friend 到一齊去旅行!  暑假時我地仲拖男帶女 5 個家庭 10 大 10 小咁一齊去新加坡旅行.  今次旅程簡直為小朋友度身訂做, 6 日去左 2 個主題公園, 2 個水上樂園, 1 個動物園, 1 個花園仲有 1 個水族館!  相信小慈小明一定會記足一世
3. 感恩我地一去完旅行返黎就執野搬屋, 搬完屋第二日就開學, 時間之逼切緊湊, 如果唔係有天父恩手托住幫忙, 真係冇可能做得到架!


天父必看顧你, 時時看顧, 處處看顧, 衪必要看顧你, 天父必看顧你!

祝福大家, 恩典夠用 ^^