郭老師生左個老虎女 (差幾日先係小白兔), 於是今日既家長會就由陳老師見我~
一如以往, 我都係同陳老師閒話家常 ^^ 陳老師一直都睇好小慈係一個 smart 既學生:
有責任感 - 每一日都交齊功課
認真學習 - 上堂非常專心, 主動答問
對老師既說話上心 - 上堂出口頭通告, 例如訪問家人 xxx or 帶 xxx 回校等, 小慈每次都必定完成任務, 少有甩漏 ! 好少唔記得!
陳老師尤其欣賞小慈對小明既愛, 讚小慈係一個絕世好姐姐!! 非常非常照顧弟弟, 寵愛有加! 好成熟, 好懂事! 小明初初返學需要小慈係身邊陪伴, 都係老師首肯小慈出去小慈先會去, 老師需要小慈返黎上堂, 小慈又會即刻收放自如咁專心上堂, 真係好乖!!
若要講小慈既缺點, 陳老師就話係食飯慢, 真係好慢!! 已經係全班份量最少個個, 都要食第尾, 同小慈度高磅重 (今個月 15 KG = 33 磅, 高 103.5 cm) , 陳老師都肉赤小慈真係太瘦!! 之前出過飲食龍虎榜, 又試過食得最慢既小朋友要企起身食, 又教佢地睇鐘幾多點要食完, 而家既招數係食得快可以自己揀圖書睇 or 去做自己鍾意做既野, 花樣百出! 小慈有時都有進步, 陳老師都話勉強唔到, 唯有幫佢小食多餐! 做媽媽既我係呢方面都一早投降, 好在小慈都聽話, 一定要佢食晒 d 咩 or 至少食幾多佢做到我就算, 有晒份量唔會營養不良, 一直都健健康康!
反而係我留意到小慈近來好 "八妹", 成日同我咬耳仔話講 "秘密" 俾我聽, 有時話唔鍾意同邊個同學玩原因係佢臭?! 又開始識比較, 會話邊個同學學緊芭蕾舞好靚, 又話邊個同學好曳攪到老師好唔開心....等! 我非常注重品德教育, 仲以為呢 d 係小學生既行為估唔到 K2 就出現??!! 陳老師就話學校呢類問題唔算嚴重, 始終佢地由 N1 直升上 K2, 由細玩到大, 有自己既圈子會特別鍾意同某幾個朋友仔玩, 再加上 4 歲半既語言能力高左好多, 佢地已經學識左表達自己既感受, 會有自己既喜好愛惡, 陳老師仲笑我應該開心小慈咁願意分享學校既野俾我聽, 好多小朋友放學返到屋企係唔提學校裡面既人事物架!
總括而言:
恩慈個性和善, 乖巧懂事, 是一個善解人意的乖孩子, 在認知發展上, 恩慈在掌握控筆技巧方面漸有明顯的進步, 亦能以認真的態度進行功課練習, 此外, 恩慈在認知學習活動上, 樂於主動探究及有計劃地解決問題和尋找答案的方法, 如懂得從書本中找資料以及運用簡單的語句進行匯報, 在美藝發展上, 恩慈的創作漸見精細, 能運用多種材料進行創作, 並以鮮艷的色彩來繪畫各種線條作構圖, 從而把作品美感表現出來
備註: 獲得親子花燈設計比賽之最具創意設計獎 (我真係唔知我地贏左)
我每次參觀小慈課室都會把握機會影相留念~
另外, 扣除聖誕及新年長假, 查實小明只係返左 1 個月學左右, 因為小明返學返得少, 所以上學期派成績表就冇佢份, 估唔到既係佢已經重左 1 KG !!! 可能學校 d 野岩佢食, 老師話佢每逢食早點晚點都必定舉手要添! 午餐通常食得論盡 d 同埋眼瞓就好少要 encore, 不過都好叻仔會自己食晒唔鍾意人地幫手, 會話:
"我自己! Me! Me!"
有一次食食下飯見佢趴左係枱面瞓到流口水, 老師仲話唔怪得課室咁靜 XD 最鍾意食雞翼, 白飯, 香蕉, 飲湯, 平時最鍾意飲晒 d 飲品先開始開餐
15/02/2011 體重 12.5 KG 身高 88 CM
1 月既表現仲多左 1 個 "良好"
- 在飯前及便後有洗手習慣
- 有應對能力
雖然冇成績表, 但我對弟弟既學校生活依然好了解, 因為我差不多隔日就同老師通電話!
連老師已經覺得小明適應晒學校既生活, 跟到進度, 好乖, 就連長假期後返學都冇後遺症, 每朝都係同工人姐姐分手個刻喊少少, 之後都好快收聲, 咁叻仔真係估唔到!
小明仲已經成為學校既寵兒!! 上至校長下至嬸嬸都對弟弟讚不絕口!! 所到之處都必定被抽水調戲, 摸面既摸面, 拖手既拖手, 背脊呀, 頭髮呀都摸均晒, 差 d 想咀佢添架勒 XDDD 睇得出真係好錫弟弟, 佢地仲要每次見面都同我講:
"你個仔真係超級得意呀! 聽佢講野真係笑死人! 大人講咩佢又講咩, 識搭訕, 真係好攪笑, 有時講野又識氹人開心, 真係好抵錫架佢!"
其中以班主任馬老師最為誇張, 佢同我講:
"恩明真係好得意, 每個星期五我都好唔捨得佢走, 好想攬住佢抱佢返屋企!!"
馬老師當時既肉緊表情我仲歷歷在目, 怕且佢已經唔記得左弟弟錯手打左佢一巴 :P
小明, 你咁得人鍾意爸爸媽媽都好開心, 人緣好係可遇不可求既一樣野黎架!! 多謝天父!!
沒有留言:
張貼留言