近視

小學三年級, 小明 8 歲半 右眼 75, 左眼 175
健康院發現小明近視肥佬, 再去理大驗眼, 因鴛鴦眼嚴重所以一定要戴眼鏡

小學四年級, 小明 9 歲  右眼 150, 左眼 300
@@ 半年內近視已經深左一個 double!  用番個眼鏡框配副新鏡片唔好徙

小學五年級, 小明 10 歲 右眼 300, 左眼 350, 50度散光!
同學仔介紹去盲人輔導中心驗眼平好多, 又鑒於小明近視加深 double 上, 試配 $3000 的 DIMS 六角形鏡片眼鏡睇下可唔可以減慢近視加深既速度

升小六暑假, 小明 10 歲半, 右眼 350, 左眼 350, 散光 50
半年又深 50, 兩隻眼終於唔再鴛鴦, 但 DIMS 眼鏡作用未見, 再加上呢副鏡框經常令小明鼻樑位紅腫敏感, 唔想再半年投資 $3000 於是用番第一個框換番普通鏡片

小學六年級, 小明 11 歲, 右眼 425, 左眼 375, 散光 50, 75
過 400 度了..... 嗚嗚嗚~~~  同朋友傾開偈發現除左 DIMS 鏡片, 亦有硬既隱形眼鏡戴住瞓覺去改變眼球形狀以減去近視 (好似種三角形西瓜既原理), 原來仲可以滴眼藥水減近視架 (發現新大陸)!!

小慈小六 11 歲半時 check 到有 75 度近視, 跟住中一 13 歲增加到100 度, 話開始睇唔到黑板於是配左一副眼鏡返學用.  鑒於小慈瞓覺定過小明又唔會瞓瞓下摔眼, 我就帶佢去試戴硬既隱形眼鏡, 希望改善眼球形狀連 100 度近視都冇埋咁就正!  點知小慈非常非常唔鍾意戴硬 con, 痛到不得了不停流眼水, 寧願一世人戴眼鏡都唔要戴硬 con...... 佢咁堅持我都逼唔到佢, 100 度就算啦!

為左弟弟, 我真係唔想佢一年一年咁深近視落去, 於是今日我就帶弟弟去見呢位可以滴眼藥水既林醫生, 聖誕時預約, 都差不多兩個月先 book 到期, 林醫生好爆啊

經過一輪檢查又放大瞳孔咁, 林醫生話弟弟而家戴緊呢副眼鏡只係同新度數相差 50幾 70幾度, 可以唔駛配過副, 用到 8 月再覆診.  至於眼藥水, 林醫生解釋話原先呢隻藥係俾初生 BB 驗眼用既, 份量 1% 可放大瞳孔 12日, 之後發現原來呢隻藥份量減至 0.01% 可以有效控制近視速度至每年 25 度, 效果當然因人而異啦!  所以弟弟而家可以試下滴 0.01%, 滴半年再睇情況

每晚睡前滴一滴, 30 支獨立包裝承惠 $500, 呢隻藥一定要由醫生處方, 出面藥房冇得隨便買架

除左滴眼藥水, 林醫生仲話有研究顯示, 每日戶外活動 40 分鐘都有效減慢近視速度!  戶外活動唔一定要做運動, 當然做埋運動梗係好啦, 戶外活動可以睇書 / 曬太陽 / 坐下 / 睇下風景咩都得, 總之就係要自然光, 唔要有瓦遮頭光管燈!  依~~  呢樣做到喎!  特別係而家停課, 我地又有天台, 上去 40 分鐘咪得囉!  就算返左學, 林醫生話行返學放學如果有 40 分鐘路程都 OK!

林醫生仲話近視散光呢 D 某程度上唔係好關手機打機事, 好多時係眼球形狀既問題, 有 D 人係天生深近視既, 遺傳既, 某 D 人種如菲律賓人非洲人好少近視, 因為佢地眼球天生比較圓, 相對地冇亞洲人眼形長就容易近視!  嘩~  真係長知識啊!

小明非常聽醫生話, 返屋企即刻做 40 分鐘戶外活動, 竟然係戶外瞓覺...... 真係俾佢吹漲, 你對眼呢?  冇用過對眼室內同室外有咩分別呀先生?!?!

我未做 lasic 之前都只係 325 度近視, 爸爸都係4百幾, 弟弟你唔好青出於藍得咁緊要先得架!  希望雙管齊下, 小明 BB 唔好變成一個 800 度近視, 除左眼鏡就等如盲左一樣既人啦!