我想做既第一件事, 就係返教會! 過往幾年既復活節我地唔係去旅行就返係左鄉下, 真係未試過參加受難節崇拜同復活主日, 我地咁開心可以放復活節假全靠主耶穌, 於是今晚全家一齊返教會為的是紀念主
樂意事奉主歌唱進衪的院, 向造物主宰虔誠獻詩篇, 今晚希幔同早堂一齊獻詩, 同心事奉
獻唱十架上施恩惠 & 面對十架, 超好聽及有意思!
文牧師證道, 我地要學像這個女人 (連名都冇) 打破玉瓶, 傾盡所有去服侍主
耶穌憐憫跟隨祂聽道的人又累又餓, 吩咐門徒給他們吃的, 門徒話用 200 個銀幣也不夠買餅, 後來就有五餅二魚餵飽 5000 個男人這個神蹟, 仲未計婦女和小孩! 呢瓶純哪噠香膏可以賣 300 多個銀幣, 比例計可以買餵飽 7500 個男人既餅, 係真係極貴既價錢!
「由她吧!....... 是一件美事........但是你們不常有我」令我非常觸動!! 反思, 信耶穌要信到一個咩野程度, 如何傾盡所有?
誰人受痛苦被懸掛在木頭, 至高的愛盡見於刺穿的手
主復活, 主為我死!
星期日一早返教會慶祝主復活, 小慈做小幫手幫大家分組玩遊戲
遊戲由阮師母負責, 組員要去搵唔同顏色既復活蛋再拼湊金句, 然後要商量點樣演繹呢節金句! 好刺激, 我組用話劇演繹, 秋的一組用朗誦方式, 玩完之後大家已經背左呢節金句了! 非常好的方法 ^^
人子必須被交在罪人手裡, 釘在十字架上, 第三日復活 (路加福音 24:7)
完左崇拜飛快回家照顧呢位殘障小朋友, 見佢可以屈曲手肘仲可以打機, 應該已經冇咁痛, 於是開始做唔駛寫咁多字既假期功課, 回復古靈精怪既弟弟將咕臣放上頭話咁樣好精神喎 :DDDD
醫生話怕弟弟有骨裂, 癒合唔好會影響發育, 穩陣起見都係照張 X 光
照完 X 光仲有得行下街, 呢幅 Lego 牆好得意!
左邊睇同右邊睇係唔同樣架
小慈近來愛上嘆咖啡奶茶, 礙於小朋友唔可以吸收咁多咖啡因影響身高, 我唔會成日俾佢地飲, 於是每次有得飲都好珍惜! 今日小慈嘆個杯係凍焦糖咖啡果凍, 弟弟個杯係北海道特濃朱古力, 好識嘆
仲去玩具店攪攪震, 6+ 既玩具都玩到唔捨得走
又趁放假「監」小慈剪頭髮逼佢入髮型屋, 剪 4 吋同偷薄等佢夏天冇咁熱, 個衰妹竟然喊哂口好話我剪佢咁多, 要我影相俾佢睇剪 4 吋後紥辮係咩樣, 見到仲有咁長先破涕為笑 @.@
失守了! 驗眼發現小慈半年內由 50 度近視增至 100 度! 視光師勸喻佢配番副眼鏡, 話發育時期近視會深得好快
話咁快假期已經去到尾聲, 因為弟弟手痛既關係好多活動都唔可以玩, 趁今日弟弟要返學, 我問小慈想去邊度? 媽媽同你拍拖好唔好? 小慈大大聲話好但諗左好耐唔知去邊, 於是我拋左幾個 proposal 出黎俾小慈老闆, 佢終於決定去踩單車!! 我地住沙田區咁耐都未試過租車踩, 原來都好方便, 大會堂旁邊既沙田公園有好多單車店, 我地今次幫襯添好運, $70 租一日, 10:00 am - 7:00 pm, 沙田還車又得, 大埔還車又得
店員話沿住城門河一直踩, 一條路好容易又多景點
出發了!!
沿途有指示牌, 真係好容易噃
同乖女 selfie 下先
見到吐露港喇!!
半個鐘踩到去科學園, 半個鐘入大埔海濱公園, 算好快, 不過小慈已經冇力, 第一次踩咁遠已經好叻女! 好在放低架車又搵到間有冷氣既小食亭食番碗腿旦麵就開心晒, 叉番電 ^^
一場黎到又陽光普照, 影下靚相先走
在水中央有小白露一堆仿似畫在海上
回程仲快唔駛 1 個鐘就攪掂, 其實我地租 4 個鐘都夠! 而家時間岩岩好我地可以去接弟弟放學, 一齊去麥當當食 tea, 小慈攬到弟弟實一實久別重逢一樣, 膽怯怯咁同弟弟講我地去踩單車, 弟弟好大方冇嬲喎, 上次我地都冇等佢去左海洋公園, 而家一比一打和 :P
Jimmy 斷糧, 又係時候俾弟弟出去旺角啦! 第一時間去雀仔街, 偶遇鸚鵡開 party, 好多隻呀!!
又俾佢捉到隻識飛既蚱蜢, 好難捉所以勁有滿足感, 仲用左 $20 買個特製私家兜俾佢
滿載而歸既郭小明, 勁開心
大包小包因為我地買左 D 養魚既工具, 斑馬魚兩包用氣泵養住, 魚仔一包用來餵 Jimmy
唔知係魚仔太大條定 Jimmy 唔係太餓, 食左 7 條就唔肯再食, 小慈睇 Jimmy 捕魚屢次失手, 肉緊到七情上面!
我仲搵番好多我好鍾意既舊片同小慈小明一齊睇, 例如 Volcano, 明日之後, 修女也瘋狂, MIB 等, 而家佢地追到字幕又聽到英文, 睇戲投入好多, 識欣賞! 讚!
悠閒但精彩的一個復活節假期, 一家人一齊幾時都開心 :)
沒有留言:
張貼留言