爸爸偉大地返工搵錢資助我地去海洋公園, 仲溫馨提示我地搭地鐵過海免塞車, 於是我地第一次搭南港島綫去海洋公園站! 小慈仲幻想個車箱會好似迪士尼火車咁充滿特色, 點知得燈箱幾個波波圖案同埋月台 D 柱有海洋馬賽克咋~
不過真係好快, 搭港鐵需時 45 分鐘就黎到, 但我地要轉 4 次綫 :p
問佢地想玩咩? 竟然第一時間要玩水, 可能天氣實在太熱要涼下
Wow! 6米高超大型精緻沙雕塑!
好震撼, 超勁!
佢係沙雕製作團隊之一, 真係好巧耐性同毅力呀!
玩水
玩泡
玩沙
外圍仲有個障礙賽, 不過好簡單, 10 秒就出番黎
主意多多既小明話要去熱帶雨林區
Catfish
原來佢志不在睇熱帶雨林既動物, 其實佢想經過呢度去玩射水槍, 射到人地濕晒最開心!
之後自己都忍唔住要玩激流, 幾怕俾人尋仇呀! 最終都係濕晒.....
太肚餓, 小慈話想去冰極餐廳, 我仲以為要排大隊點知竟然可以直入噃! 人潮 12:30 p.m. 殺到, 我地早著先機, yeah! 帶子卡邦尼意粉係佢地既至愛, 仲有杯 $48 芒果汁寶貝囡話要飲, 見佢咁乖又好少要求要 D 咩, 就 order 俾你啦 ^^
晏晝時間 D 企鵝原來好活潑, 好多隻都會「飄浮」去大玻璃前, 你望我時我望你, 佢地仲會表演快速游水同跳出水面, 睇到我地嘩嘩聲!
食飽飽, 最近冰極餐廳就係南北極館, 我地已經探左企鵝, 而家梗係去探肥嘟嘟既斑海豹啦! 訓練員正講解海獅同海豹點分, 最易認既就係海獅前鰭長 D 可以學識拍手掌, 而海豹前鰭得人類手掌咁細, 所以海豹上左岸會因為前鰭短而行到成條虫咁, 笑死我喇 :D
小明最想玩既極地時速因旅行團中午入場而大排長龍, 50 分鐘我梗係唔排啦, 去玩其他野好過! 發現有得玩水戰!!! 每人 5 粒水彈, 辛苦工作人員在背後不停入水紥汽球
梗係唔少得玩沖天搖擺船啦, 今日玩左兩次咋
小明好想好想玩過山車, 連跳樓機都想玩, 不過佢唔夠高.....
呢架翻天飛鷹絕對係可以將你件濕衫吹乾
Yeah! 5:00 p.m. 旅行團開始撤退, 極速之旅終於變番正常 20 分鐘, 仲可以坐佢地最鍾意既車尾位置添
小慈未夠高自己揸踫踫車, 一拖二點玩呢? 原來派咭咭既姐姐係會叫我同弟弟玩先, 之後再到我同小慈玩, yeah, 益我玩兩次 :D
快速扭軚避開車堆係我強項, 弟弟仲讚我揸車揸得好好, 哈哈哈哈哈
冇人排隊時, 海洋公園真係超好玩架! 不過三個人我就悶 D, 好多遊戲都係佢地兩姐弟一齊坐, 我就係孤獨老人..... 老公啊~~~
唯有欣賞風景解悶
一早弟弟就話要玩滑浪飛船, 不過要排 45 分鐘俾我 bend 左, 而家得番 5 分鐘排隊時間, 係時候喇
早有準備, 防水風褸出動!! 估唔到, 小慈小明坐前座, 我坐後座既前排, 3 個人既重量/力學竟然係岩岩好, 唔知點解, 但沖落黎時我簡直可以用滴水不沾黎形容!! 極其量只係濕手臂小小! 唔會濕身又冇人排隊咁爽, 滑浪飛船我地連玩 4 次!! 連職員姐姐都話我地變態 @.@
不知不覺已經 9:00 p.m. 連平時玩到唔駛食既小明都叫肚餓! 上一次試過老大街既車仔麵好食, 於是小明提議佢食餸, 小慈家姐食麵, 佢兩個分得掂我係唔理既, 自己嘆炒麵碗仔翅, 老大街冇人, 好有 feel 呀!
究竟係設計既一部份, 定係遭人破壞呢?
我仲嘆緊麵, 佢兩個已經極速食完去左玩
夏水禮夜場開到 11:00 p.m., 益左我地可以玩多陣, 不過山上既遊戲 9:00 p.m. 關晒, 得番山腳呢個遊戲仲郁, 所以悶爆都要玩下
呢條街喉, 令我諗起城寨英雄
10:00 p.m. 仲有一場雙龍奇緣, 成個公園睇既觀眾都唔知有冇 20 人, 好正呀! 無遮無擋仲有位坐
第一次在海洋公園玩足 12 個鐘頭, 於是攰到咁... 可憐阿媽我冇位坐仲要揹住個背囊全日喎
沒有留言:
張貼留言