我地一班朋友仔又試新野喇 ^^ 千辛萬苦夾到時間, 一齊宿營慶祝考完試!!! 可惜天氣唔好, 呢兩日一直落雨, 雨勢有時仲頗大添架!
我地既營舍 -- 青年協會賽馬會西貢戶外訓練營, 門口個招牌好細, 差 D 就 miss 左
邊個位都見到無敵海景!! 小慈係最開心既一個, 因為之前基督女少年軍宿營, 佢話靚到不得了既營舍就係呢度!!
成個識途老馬咁帶我地去參觀, 呢度係 gift shop, 小慈就係呢度 fing 晒 $50, 但佢最想買既公仔隻隻都 $60-80 唔夠錢, 於是佢今次就用懇切既目光望住我, 我應承佢手信呢家野梗係臨出營先買啦 >v<
落雨好多地方冇得去, 好在呢度有個小型康樂室可以玩下
又濕又熱, 都係去 canteen 嘆住冷氣等埋其他朋友仔穩陣, 小慈小明帶晒佢地既新玩具入 camp 玩
夠鐘食午餐! 已經好自然地分開小朋友一圍
我地 7 個家庭入住 14 人既爸爸營舍與 12 人既媽媽營舍, 成班朋友仔男丁強盛, 媽媽房最後得 7 個媽媽, 3 個家姐同 QQ 一個細佬入住咋
大房唔夠住, 我地仲有一間 2 人房, 由愛靜的爸爸同小明奪得, 估唔到小明唔跟我, 嗚嗚~~ 小明話唔忍心爸爸一個人喎! 係至奇, 後來俾我發現兩父子一齊食薯片飲汽水睇電視又打機, 不知幾快活
落雨天有咩玩? 原先我地有得游繩下降同埋有 3 個歷奇活動, 而家都因天雨而取消, 改為玩尋寶! 自由組合至少每隊有 1 個大人 2 個小朋友, 三個家姐二話不說一定要同組仲要揀自己爸爸, 小明又一定要跟住小慈, 於是同兩個爸爸一組, 改名 「大小組」 ^^ 跟住提示紙全個營舍去搵黑色字母牌, 真係好難搵呀!! 裡裡外外東張西望都只係搵到 6 個咋 -- MSN, PTU, LOL, OTC, OMG, AAA.... 呢 D 組合名好攪笑 :)
跟住有兩個活動俾小朋友揀, 一係整 pizza, 一係玩濕身既羅馬炮架, 小明鍾意玩水我都估到佢會玩炮架, 但我估唔到小慈會揀整 pizza 啦! 佢話佢唔想濕身, 落雨已經好唔舒服喎~
Ok 啦, 自己揀唔後悔就得, 不過整 pizza 都幾好玩, 環境又舒服, 設備又企理, 塊 pizza 係自己整既梗係好食既 ^^
多謝 Duck 哥哥既教導, 佢話佢食 pizza 食到怕, 哈哈哈哈~~~~
送外賣
小明既羅馬炮架亦在微雨中進行, 好在係爸爸跟住佢, 要搭棚扎繩整個炮台都真係唔容易, 小明最開心就係將個汽球入水整炮彈
準備就緒準備發炮
如果可以成功接到對方射過黎既炮彈, 你就可以用番呢粒炮彈黎射番佢地, 但現實邊有咁容易接丫, 於是個水炮彈就爆到成身濕晒, 好勇既小明同冬晴兩個由頭濕到落腳, 波鞋滴水 @.@ 呢張相記錄住冬晴中彈一刻, very good take!!
玩炮架班小朋友濕到要即刻返營舍換衫沖涼, 餓到不得了! 整 pizza 班小朋友就個個食左幾塊 pizza 飽到晚餐食唔落 :D
入夜, 多蚊, 大家返營舍玩, 小慈同冬晴兩個齊心滅絕營舍入面既所有烏蠅小昆蟲, 連天花板既蚊都唔放過, 玩飛拖鞋, 勁好笑!!
玩 UNO 、冚綿胎、潛烏龜係唔少得架啦
早晨!! Where is the Sun? 不過冇落雨都偷笑
兩位好家姐一早起身摺被, 收拾行裝
小慈小明 10 pm 瞓, 我頂到 12 點, 聽聞班大男孩心情興奮玩到要阿媽震壓都要成點鐘... 無論如何, 第二朝 8:00 準時食早餐
10 歲既小朋友可以玩射箭, 臂力剛剛好可以拉弓, 小慈都射得唔錯至少中目標黃心
細 B 組本來想報名做小手工, 可惜唔夠快已經額滿, 小明自得其樂玩小螞蟻都好開心, 仲裝左一隻話要返屋企養
出營了, 突然一陣大驟雨, 呢兩日把傘完全未乾過, 對波鞋吹左一晚乾乾地, 點知一出房門又濕晒, 都係著拖鞋穩陣
嘩! 停雨仲有小小陽光, 拿拿聲影張大合照先!
小朋友一堆就算圍埋打機都係開心既
食左三餐健康營餐, 今日我地決定去西貢食海鮮豪一豪佢, 好耐冇去過六福, 依然咁好味!!
縱然天氣唔好, 希望小朋友都有一個難忘又愉快既宿營經驗! 終於考完試, 開心迎接暑假啦!!!!!
