基督女少年軍宿營

小慈學校有 3 個制服團隊, 小女童軍同基督女少年軍之間, 我為小慈揀左基督女少年軍, 作主精兵丫麻!  返學校著制服係一件好有型既事, 有機會梗係參加啦!  以後逢親國慶呀, 校慶呀, 開放日時, 就著套制服返學校充撐場面, 諗起就開心 ^^

真係估唔到基督女少年軍竟然有驚喜, 3 年級已經可以參加 2 日一夜宿營!  小慈好唔想參加, 想我通告填「不同意」, 但我好興奮, 極力遊說佢唔好放棄呢個咁難得既機會!  媽媽要到 6 年級畢業營先可以同老師一齊過夜, 小慈咁犀利 3 年級就得云云... 於是, 小慈半推半就應承左, 佢之所以唔想, 係唔習慣瞓覺離開佢個枕頭 @.@  凡事都有第一次, 試下啦!

事有湊巧咩都係今日內發生!  今朝小慈非常趕, 首先返學上兩節堂, 跟住全班出新城市廣場做常識科專題研習, 晏晝返學校食飯, 跟住換制服參加基督女少年軍立願禮, 再搭車出去東涌營地, 又揹書包又帶袋仔再攞住個入營背囊, 我都登佢辛苦

常識科專題研習, 研究沙田區衣食住行既問題, 要訪問大量途人!  呢班小朋友由初初怕怕羞羞到最後放膽去問, very good 呀!

跟住就非常趕咁返學校食飯換制服, 好在小慈都攪得掂 ^^  呢位係唯一一個同班同學, 葉恩翹

仲有二年級時既同學仔 -- 周綽楠

先在學校舉行立願禮

小慈話佢淨係需要自己講「我願意」, 跟住新隊員全部一齊講「找尋、事奉及跟隨主」.... 都幾有氣勢

2日1夜宿營正式開始~~

行程都幾緊密啊

小慈話最好玩係去泥灘, 不過攪到對白波鞋污漕晒佢有 D 唔開心!  黑夜探秘係攞住個電筒去夜行都好刺激!  最後歷奇體驗係要營地入面搵數字咭, 佢搵到好多張好開心!

問佢冇枕頭瞓唔瞓得著?  小慈話佢改為攬住張被都 OK, 佢夜晚冇沖涼, 一來佢冇出汗, 二來因為營舍得 4 格廁所, 佢地 33 個女仔真係排好耐, 佢連換衫都係上格床個被窩入面進行咋  >v<  一間大房有 17 張床, 全部碌架床, 佢揀左瞓上面, 同葉恩翹一齊都好開心.  如果出年仲有機會, 小慈話佢會再參加喎  :)

小慈打左兩次電話返屋企, 第一次係夜晚 11:00, 食完糖水準備瞓覺, 老師借個電話俾佢打返屋企報平安既.  第二次係準備食午飯, 小慈見到營舍有電話就打俾我, 千叮萬囑一定要媽媽去接佢

出營 LOOK, 人仔細細要揹個咁大既背包, 冇漏野算好叻啦!

今日接小慈既仲有一個神秘嘉賓 -- 弟弟!  佢出奇地掛住小慈家姐, 講左好多次掛住, 話未試過天黑都唔見小慈家姐返屋企喎!  所以堅持跟埋我黎接小慈!  見佢兩個相逢恨晚既樣真係好窩心 ^^

我都好掛住小慈呀!  好擔心佢咁多野天氣又咁凍唔知攪唔攪得掂, 最怕佢沖涼洗頭論盡, 已經吩咐佢可以既話就唔好洗頭, 點知個衰妹因為廁格唔夠連涼都唔沖  @.@  都好既, 費事冷親, 冬天有冬天既好處!

第一次一個人係出面過夜, 大個女喇, 獨立勇敢左好多, 識照顧自己, 又玩得開心, 下次可以再放膽 D 識多 D 朋友就更加好啦~~

Good try and good start!  叻女  ^8^