遠近慈明: 2011

2011年8月17日星期三

Jimmy 的波波池

今晚有朋友仔上黎探 Jimmy 仲送見面禮!

小慈問: "呢 d 咩黎架?"

朋友答: "係 Jimmy 既波波池呀!"

其實係 d 沙沙石石, Jimmy 完全有保護色混為一體

小慈話 Jimmy 微微笑鍾意呢個波波池呀!

弟弟望到眼定定, 我估佢忍得好辛苦先唔伸手攪

我地都換左個大缸俾 Jimmy, 佢大得太快唔夠位轉身

小明將自己既手仔腳仔印係神奇畫版上面, 細細隻好 cute 呀

開心的一晚

2011年7月9日星期六

呢個玩意都興左好耐, 每年 5 月開始已經周圍聽到人地話出海釣墨魚, 我同秋秋都參加過幾次, 第一次最開心, 成船人釣左超過 20 斤, 每人至少有 10 條以上, 釣到攰唔想釣拉番條魚絲上黎時都可以勾到一條, 多成咁!! 仲要 d 墨魚超大隻, 有成個水樽咁肥呢, 真係超開心!! 不過呢次係唯一最多既一次, 最低紀錄係成船人得 5 條炒埋都唔夠咁多人食.... 食白果, 仲要成晚重複做拉線既動作當舉左一晚啞鈴, 係船上面做健身 @.@

舊年都有釣, 成績麻麻不過當同老朋友聚舊冇所謂, 今年有朋友又落力組團, 本來諗住全家出席, 但個心就好忐忑不安, 一來小慈未試過出海唔知佢會唔會暈船浪, 不過前年帶佢去沙巴坐大飛就冇事, 但成晚坐係船上面又唔同, 二來掙扎左好耐唔知帶唔帶小明好?! 佢真係太細, 成日橫衝直撞好怕佢跌落海, 唔帶佢去又怕佢扭計喊, 佢試過夜晚唔肯瞓等我地門, 又投訴我地做咩唔返屋企?!!!

考慮左好耐, 基於安全理由都係決定帶小慈一個!! 奇蹟地, 小明今晚超乖!!! 我同佢講佢太細個會跌落海危險, 等佢大個 d 好似小慈家姐咁 5 歲先去釣墨魚, 小明又非常明白, 連聲 "知道" "好" 仲非常愉快, 非常順灘咁同我地 say bye bye!! 實在太太太太太乖喇!! 我地即刻去得好安樂 XD

舅父 & 彤彤姐姐都有參加, 佢地第一次釣墨魚呀 (呢張相係小慈影既)

小慈知道自己有份釣墨魚開心到不得了, 今日差 d 唔肯瞓晏覺要快 d 出發!

點解隻船咁耐都唔黎架?

見小慈咁愁, 咀佢一大啖等佢開心番先 ^8^

YEAH!!! 我地隻船出現喇~

坐船尾穩陣呀

望著海一遍

我地停係橋咀島對開海面既牛尾海, 小慈手執魚排開始釣, 都似模似樣架!

YEAH! 釣到呀! 拉上黎先知係雞泡魚, 識 "嘰嘰" 叫架佢!

小慈好興奮, 不過要鼓勵好耐先肯同雞泡魚影相, 有 d 驚

發脹與未發脹既雞泡魚

應該已經脹到極限, 勁 cute! 玩左一陣就放番落海, 希望佢大難不死必有後福

連續釣左兩條雞泡魚之後, 終於都有墨魚上釣喇

全船 29 人既收穫 -- 墨魚 12 條, 雞泡魚 8 條

由於海面突然有大浪, 成隻船一高一低好似玩海盜船咁刺激!!! 就係最刺激既時候, 原來 d 浪整濕左船既發電機仲燒埋, 成隻船即刻漆黑一遍, 船長打開船艙維修之際又有一個大浪, 我地其中一桶墨魚仲跌左落船艙沾染左 d 機油唔食得 @.@

今晚冇得食避風塘炒墨魚仲要提早回程, 好在隻船有後備發電機可以捱到返碼頭咋! 如果唔係大家今晚就要係船上面過夜.....

大人頂得住, 小慈已經眼瞓!! 10:30 pm 係佢既極限, 唔怕! 幾時都有爸爸攬住 :)

美中不足呢!

2011年7月8日星期五

貓貓

好掛住舅父, 亦都好掛住佢 10 隻貓, 今晚帶埋小慈小明去探佢地

舅父慷慨獻貓, 10 隻貓入面有幾隻都好親民

舅父教用電筒同貓貓玩, 等佢地追住 d 燈黎撲, 追到撞埋牆真係好攪笑!

小慈鍾意用貓棒因為比較易控制, 玩到捐枱底

太近喇, 小慈! 你要扮雀仔飛引貓貓撲埋去麻

呢個角度好 D 嘞!

小明都學識俾隻手手貓貓嗅下, 交個朋友

細細力摸~ 今次再冇暴力扑貓貓, 冇嚇親! 不過都係太興奮, 兩姐弟既超高頻尖叫, 大笑, 都係嚇到 d 貓貓靜雞雞走晒

想摸

又驚! 仲嚇到走埋, 都係小慈大膽 d

舅父既貓玩具真係好多, 今次出釣魚竿弟弟都識玩

貓貓唔 show 弟弟, 佢就上枱追佢俾反應, 攪到黑貓健健起身走, 笑死!

親吻瑟瑟, 佢 d 毛好滑呀

親吻 BB, BB 係舅父最錫既貓

小明使出招牌豬咀

同舅父影下相啦

外甥多似舅?

多謝舅父俾左一個愉快既晚上小慈小明, 佢地今晚好開心!!

2011年7月7日星期四

小明成功戒片好記性

2 歲半既小明已經成功戒片喇~~

由 5月中第一次成功 wee wee, 今日自己話要 poo poo 又真係屙得出!! 成功了!!! 未到小暑弟弟日頭已經唔駛著片, pat pat 唔駛再包住熱辛辣辣, 爽呀!! 我聽到佢係廁所 dom dom 聲真係好滾動架 ^^

不過小明著片習慣企係度屙 poo poo, 戒片既呢個月都有非常論盡既時候:

1. 試過玩玩下玩具跌左一舊野落地下, 我仲奇怪點解會有啡色既泥膠??!

2. 想 poo poo 點知用錯力連 wee wee 都出埋, 一地都係 @.@

3. 洗白白時洗洗下無端端多左 d 浮游物體.....

戒片最快既方法當然係唔著片啦! 只著底褲令弟弟即時明白咩叫賴丫麻!! 當然咁做最辛苦個個就係工人姐姐, 弟弟一日至少整污漕底褲 1 次, 最勁係 5 次, 仲要抹地呢! 多左好多功夫真係辛苦晒你!

除左戒片有野真係要讚下弟弟!! 同佢講唔再用奶樽飲奶奶, 要好似小慈家姐咁用杯飲, 弟弟即刻應承, 仲牙齒當金駛真係冇再用過奶樽! 用杯飲又叻叻冇倒瀉過, 飲到一滴都冇剩! 真係乖到不得了!!!!! Bye Bye bottles!!

小慈好記得我講過既每一句說話, 特別係我應承左佢既野, 真係追到天腳底都會問我要! 我成日以為小朋友 3 歲前係冇咩記憶, 如果大人唔加強佢, 唔提住, 唔幫佢溫故知新係會冇晒既! 點知 2 歲半既小明令我既想法有 d 改變......

事件一:

我睇緊新聞, 有幾個人搭船出海, 小明入黎望左一陣, 話...

小明: "我都有搭船餵過魚架! d 魚好肥添!"

我: "幾時餵魚呀?"

小明: "我地仲見到馬老師添呀!"

我: "啊~~ 你話上次同學校旅行個次? 我地一齊坐艇仔買魚糧餵魚魚?"

小明: "係呀! 媽媽我地幾時再去旅行呀?"

事件二:

5-6 月既時候, 我每次帶小慈出去上興趣班, 小明就會表現得依依不捨, 又攬腳, 又要 kiss, 又要 big hug, kiss 完一次未夠皮仲要求 kiss 好多啖, 指晒面既上下左右鼻哥要你錫晒, 有時錫完都仲會喊唔俾我走! 我咪唯有安撫佢請佢食 d 野, 有時又會應承買 d 佢鍾意食既野返黎!

呢個月見佢冇咩野我就冇再咁做, 唔想成為例牌動作就失效, 點知當我返屋企....

小明: "媽媽, 你有冇買芝士條呀?"

我: "冇喎, 冇得賣過! 你頭先咪食左芝士囉!"

小明: "咁雞蛋仔呢?"

我: "冇買呀"

小明: "薯條呢?"

我: "都冇呀! 媽媽好肚餓趕住返黎食飯呀!"

小明: "下....... 咩野都冇..........."

其實我只係買過一次薯條因為連續兩個星期都買唔到芝士條唔想佢失望先買, 都叫有個 "條" 字麻, 估唔到小明真係好記性成咁!! 厲害! ! 厲害! 慎言, 慎言!!