早 2 日打完肺炎鍊球菌第一針即晚已經 37.3 度, 有 d 熱但唔係發燒, 尋日又再熱 d 37.8 度, 仲開始咳同埋有痰聲, 因為咳訓得唔好非常扭抱, 飲奶氣喘掃風時仲噴奶添 @.@
今朝又再燒多 d 37.9 度接近警戒線唔到我唔去睇醫生啦, 自從冇左大圍既陳醫生我都唔知睇邊個好, 都係近近地去番附近睇丘祖麟, 我唔想下下出旺角佐敦咁遠, 丘醫生都係兒科, 應該唔太差掛
小明證實患上感冒了, 上呼吸道有痰, 不過肺好清, 丘醫生話係俾小慈家姐傳染既, 醫生話第 2 胎通常都早病因為家姐阿哥, 媽媽又通常因為要照顧大 B, 陀既時候休息唔夠加上媽媽既抗體係 36 - 40 周先會過俾肚入面既 BB, 咁小明 37 周出世就係少左 d 抗體, 所以早病唔出奇!!
OH MY GOD~~~ 唔係我想小明早出世架, 佢要早產 3 個星期我都唔想架, 點估到咁就俾得少少抗體佢先得架?! 好在我到而家都餵到人奶俾佢叫做補嘗番 d 啦, 醫生呵?! 醫生就叫我放心, 佢話而家早病左, 返學時又會病番少 d 條數一樣喎... 唉~~ 咁都冇計啦!
醫生吩咐盡量唔去人多地方, 人多就多菌, 某大型商場 d 小朋友去一次病一次少去為妙! 仲有每逢有痰有發燒, 飲奶粉一定要開稀 d, 平時開 180ml / 9 匙奶粉今日落 6 匙好喇, 奶粉甜易惹痰, 人奶多水份就唔駛, 多 d 用生理鹽水幫弟弟洗鼻, 滴鼻等 d 污漕野沖落胃消化左佢, 痰一係嘔出黎, 一係屙出黎既, 不過咁細個就唔好吸痰 or 拍痰, 因為 BB 會好辛苦架, 慢慢就會好番
唉~~ 咁細個 BB 好難餵藥, 喊到九彩大叫 "唔好~~ 唔好~~" 冇辦法啦, 邊個叫你咳先得架! 好在食左 2 次藥就咳左一舊好大既黃痰出黎, 當堂舒服晒~~
弟弟既咳聲竟然同小慈既一模一樣, 真係連我都分唔到, 有家姐返學帶 d 細菌返黎係會易病 d, 弟弟你要頂住呀!
呢 2 日終於發現自己有對手, 眼甘甘咁望住
病到個衰仔吽吽地... 可憐...
小病是福, 早日康復!!
沒有留言:
張貼留言