由當初一大班人玩到而家剩番 7 小福, 最攪笑既係之後大家都生 2 個, 由巧巧細佬 Bernard 0809 開始計, 跟住係小明 0811, Enson 細佬 Jacko 0901, 詠詠細佬 0903, 柏弦細佬柏橋 0905.... 差不多每 2 個月就有一個 BB 出世, 仲要全部都係仔呀!
我仲放緊產假忙碌地餵人奶, 不過都會上網同班靚媽傾下計, 講開澳門開左間新既酒店叫 "威尼斯人" 裝修設備都比得上真正既威尼斯, 最吸引既就係有一個 playroom 叫 Q 立方, 有 3 條好刺激既滑梯好吸引, 又有 $3000 package 包酒店房間 / 早餐 / 2 小時免費玩 Q 立方 / 送回程船飛..... 好抵!! 坐月都冇咩點同小慈出街玩, 難得大家興緻勃勃一呼百應, 於是 6 個家庭總共 19 人即刻 book 酒店出船飛一齊過大海~~~
都有少少唔放心小明架, 不過都係一晚唔見我姐, 遲 d 返工都要交俾工人姐姐湊, 當提早練習啦! 反而我係擔心人奶既問題, 冇理由帶埋 d 架生去澳門架麻, 算啦, 玩完先算! 小慈都唔知咩叫澳門, 不過知道爸爸媽媽帶佢出街, 又同熙熙一齊搭巴士去港澳碼頭已經好似大鄉里出城咁依嘩鬼叫好多野講, 之後仲同巧巧, 搴搴, 柏弦一齊搭雙體船更加超級興奮左跳右跳
搭 12:30pm 船, 1 個鐘頭既船程差不多所有小朋友都訓晒晏覺, 叉電備用 ^^ 2:30pm 先到酒店 check in 放低行李
你睇我地間房幾大~~ 仲有 2 級樓梯行去起坐間添架
一班小朋友浩浩蕩蕩出發去食下午茶了
去好出名既 "大利" 食豬扒包 and 豬扒麵做 tea
好耐冇飲過咁大支樽裝汽水, 馳名豬扒包都幾好食, 如果個皮脆 d, 包身軟 d 仲好
食飽飽就返酒店勇闖 Q 立方~~
呢度真係好大, 好 colorful, 好吸引呀!
小慈同熙熙非常老友
你睇呢度幾大, 樓高 3 層!
小慈玩到成隻冇尾飛陀咁呀~~
傳聞中超好玩既滑梯, 原來咁高都幾驚架! 初時小慈玩一次就話唔玩, 隔一陣我再引下佢佢又去玩, 足足滑左 6 次, 值回票價了~~
依? D 波點解會升上黎既?
開心小慈 :)
2 個鐘頭不停咁走都算係小朋友既極限! 小慈玩到大汗疊細汗, 濕晒~~~
一班小朋友就玩到熟晒, 一路走一路大叫對方個名, 興奮到不得了
開心到碌地
一班餓鬼去氹仔既誠昌飯店食馳名既水蟹粥, 第一啖食落口係幾好味, 再食就開始覺得咸! 我地一行 19人叫得最多既係汽水, 頭先係 Q 立方已經出好多汗好口渴, 再加埋味精餐, 每人差不多飲左 2 罐汽水 @.@ 算啦, 好又一餐唔好又一餐, 今次俾旅遊書呃左
順道去埋莫義記食 $10 杯既榴槤雪糕, 要食甜品中和番呀! 小慈睇唔上我杯榴槤, 食左一啖就走去食爸爸個杯芒果, 仲好, 我獨食不知幾好味
熙熙即日來回要返香港了, 影張大合照先
9:00pm 去永利酒店睇吉祥樹, 我地去到竟然見到條龍!! 原來佢地每半個鐘表演一次架! 等緊棵吉祥樹時小朋友就自己諗野玩, 玩火車穿山洞都笑到卡卡聲
London bridge is falling down~~~
返左學大家都唔同晒, 終於識得一齊玩!
食埋杏香園既糖水再買埋手信, 返到酒店已經 11:45pm 喇, 小慈仲係 natural high 中, 好在沖完涼飲埋支奶唔夠 5 分鐘就訓左, 體力嚴重透支
我就好慘呀~~ 我個胸硬到成舊石咁青筋都出晒, 好在係酒店, 我呢左係廁所用熱水先按摩 15 分鐘再輕輕力慢慢吱走 d 人奶先似番個人! 真係痛死我! 睇住我珍貴既人奶沖晒落坑渠都好心痛架, 不過真係冇辦法, 我冇帶咁多樽裝住佢地, 呢度又冇雪櫃雪到聽晚..... 可惜....
