第二次呈分試, 完!

辛辛苦苦考完第二次呈分試, 成績都算唔錯, 保持水準, 美中不足如果科數學可以再突破一下就好了!  Anyway, 盡左力考完就算架喇, 學校話 1 月頭就會出到分估計到小明係 Band 幾, 今年學位同人數只係相差 40, 不宜太進取, 最好至少考一間直資, 好消息係 2 間自行一面試完 3 月尾就會知結果, 如果冇消息又係要捱到 7 月等大抽獎.... 我冇咩心水, 之前都冇時間參觀學校, 到想參觀既時候已經因為社會問題取消晒開放日, 無從稽考 @.@  小明條路點行, 我地大大力禱告交俾天父啦!

考完試梗係要獎勵下, 放大假既我連同爸爸一齊等小明放學, 開定茶等我既乖仔, 知佢最鍾意食奶黃包同埋煎薄罉 ^^

跟住我地仲有重要任務!  就係帶呢個 11 歲仔去換新身分證!  自己睇自己個仔真係零舍得意, 你睇佢張身分證相幾靚 :D

另一重大發現, 11 歲既小明終於重過小慈家姐喇!!!  由細到大都係維持 2kg difference, 近來我覺得小明好墜手, 果然一上磅高下立見 :D  其實小明唔係肥, 只係小慈家姐過輕而已.....

考完試就可以恢復日常活動, 小明真係好鍾意打鼓, 終於都肯學一樣樂器 ^^

夾公仔猶如倒錢落海, 見係 $10 就俾你玩下啦

真係唔明白小朋友點會喜歡呢隻 PePe frog

一嚐戴口罩滋味

考完試唔駛密鑼緊鼓咁補習, 終於可以返詩班喇!  今日仲係 Queenie 姨姨生日添!

團契慶祝 10-12 月之星生日, 我地屋企有兩個代表

排除萬難先可以睇到早場

恨左睇 Frozen II 好耐, 以前睇戲我要做預習, 事先要講解俾小慈小明聽故事內容怕佢地睇唔明, 而家識得同我講唔准劇透 @.@

爆谷同汽水套餐仲貴過早場張飛

等開場既時候, 呢位小朋友竟然係度靈修睇每日天糧!!!  媽媽超級安慰!!!  常常親近天父, 聽衪的話語, 係天父的好孩子!!  Very Good!

因為片尾有彩蛋, 我地係戲院入面唯一一家人真係睇埋先走, 睇完 Mon 都熄埋 :DD

夜晚同兩個姑媽提早做冬, 一齊食打冷

椒鹽豬手脆卜卜, 小明連骨都唔放過

食食下扮參孫用驢腮骨打人, 爸爸同小慈家姐好配合 :DDDD

久未合照既三表姐弟, 昊昊已經高過小慈仲變埋聲, 弟弟就已經重過小慈

考完試一身輕鬆, 精彩活動陸續有來~~