跟住, 小學班主任明確通知小慈屬於 Band 2 學生, 到 4 月中參加統一派位要填表, 甲部一我依然一條心填跨區一間, 甲二填本區, 甲三我直情漏空免得碌左入去, 到乙一再填一次甲二填過既同區中學, 希望命中機會大 D, 之後我真係填唔晒 30 個格, 沙田馬鞍山冇咩 Band 2 好學校揀, 於是頭幾位我填晒區內所有基督教中學, 之後都有 D 亂黎, 真係已經冇所謂.....
叮囑小慈最後一次小學考試要醒醒定定, 萬一派位派得唔好, 張成績表要靚靚仔仔攞去叩門, 點知個衰妹科數史無前例咁低分之餘, 連英文都炒埋 @.@ 玩到咁大阿囡!!!!! 雖然最後拉晒所有分數係合格既, 但真係唔好睇羅, 張成績表中英數 BCD 咁, 即係連門都唔駛叩啦......?! 唔係喇, 都係兩手準備, 叫小慈返學校請班主任寫定 reference letter 以防萬一! 點知放榜前一日, 小慈放學返黎話班主任有俾 reference letter 其他同學, 佢冇..... 冇? 點解既? 小慈話班主任話佢派得好, 唔需要信喎.... 下? 我聽到 R 晒頭.... 唔係聽日先放榜咩? 點解班主任咁快知我地派得好? 滿腦子疑惑但又放晒學冇得問.... 忐忑啊~~~~~ 秋秋話咁講唔係應該放心咩? 話左俾你聽派得好, 連叩門 form 都唔駛填啦! 我以為做阿媽既點都要安排下、計算下, 既然秋秋咁講, 好! 我地全然交俾天父, 一家人手拖手祈禱, 求天父俾我地, 特別係媽媽我有信心!!! 祈完禱大家早 D 瞓 ^^
2018年7月10日星期二, 天晴, 我地全家一齊搭車返學 (係, 小明係要返學既), 小慈先入課室, 我同爸爸及其他家長企晒係學校門口等, 大家故作輕鬆 :D
跟住入禮堂等, 校長和副校長預備左一大堆資料同家長講, 話 2018 年係學校派位最好既一年, 80% 92 人成功派第一志願!!! 57% 派 Band 1, 32% 派 Band 2, 11% Band 3, 聽到大家嘩嘩聲!
望到頸都長, 終於見到小慈! 感謝感謝天父, 真係第一志願呀!!!!
我仲有一絲希望係甲一 :P 而家真係唔知係自行面試時收左小慈? 定係甲二中? 定係乙一中??.... Anyway, 總知就係第一志願啦!!! 真係唔駛叩門了~~~~
好朋友念恩都係第一志願, 不過佢兩個唔同學校了, 依然可以 keep in touch 的!
唔駛睇番其實都知小慈大個左好多, 不過一對比就好有趣 ^^
7:50 am 返學 8:20 am 就放學, 咁早冇野做, 於是去飲茶啦!! 切薄撐為小慈慶祝 :DDDDD
7月12日星期四, 去中學註冊, 從此以後成為 MOSTT 人了 ^^
呢間學校我地一 D 都唔陌生, 第一次黎呢度係面試, 小慈已經係咁話呢間學校好大, 禮堂好靚, 好鍾意呢間學校架喇 ^^
好忙碌, 註冊包括埋買校服、買書、報英文銜接班、填個人資料等等..... 本來一直都好興奮, 直至到被通知要做 3 本暑期作業同 3 個讀書報告, 更要連上 10 日英文班, 小慈即時 down 左, 問我: 「唔係放暑假好輕鬆既咩...?」
撞到小一同學, 總共有 5 個熟悉既面孔 :)
愛錫家姐既弟弟今日都有跟住一齊黎註冊架! 小明有問我佢遲 D 會唔會同小慈家姐同一間中學? 真係唔知, 要俾心機讀書先, 考晒呈分試再睇下咩環境
7月14日星期六, 中一家長迎新日, 一早見到樂團準備為大家演奏, 好榮幸呀!
學校有好多唔同既學會, 小慈已經鎖定左中國舞、籃球、排球 ^^ 不過對合唱團、魔術學會、電影學會等都好有興趣, 揀到好興奮之際, 校長話大家最多報一至兩個好喇..... 哈哈哈
熟悉既沙田大會堂, 輕鬆睇表演
祟真中學, 分校遍佈港九新界, MOSTT 前身係筲祟, 之後先搬入 MOS, 係掘起得好快既學校, 出名校風好, 老師有教學熱誠及愛心, 雙班主任, 英文教學, 默書少測驗多但範圍少, 功課量適中, 升大學比例 32%
English Drama 都做得好好呀!
60 歲生日快樂!!!
真係好感恩小慈對 MOSTT 有好感! 亦奇妙在呢間學校有好多人熟悉 -- 我有同事個仔讀緊; 我死黨個舊同事做開輔導又教英文, 非常有愛心又關心學生; 連爸爸以前中學時個女班長而家都係度教緊仲負責基督徒團契..... 一切都好似安排左咁, 好特別、好特別既感覺!
小慈, 呢間學校係天父安排俾你, 係最適合你既學校, 你要繼續努力加油呀!!
沒有留言:
張貼留言