4 級鋼琴試

本來我係想小慈小學畢業前考到 5 級鋼琴既, 不過琴老師話 2 4 6 咁上會好 D, 所以小學畢業前考 4 級啦!

認認真真咁練考試歌其實由 7 月先開始, 話咁快 10 月尾就要考試, 好似未預備好咁, 但小慈就充滿信心, 今晚 book 左考試房俾佢練琴, 試場好近, 行都行到非常方便

呢間考試房有 D 細

好耐冇彈過三角琴, 小慈話部琴既聲有 D 怪怪地

彈足一個鐘頭, 小慈囡散晒.........

考試日要返學, 我請假去學校接佢早走, 返屋企練一練琴就應考了

台上一分鐘, 台下十年功, 小慈考試 15 分鐘就考完!  佢話考試時都有驚, 但諗起我話: 媽媽坐係考試房出面支持你, 爸爸開緊工又支持你, 弟弟返緊學都係課室支持緊你架!..... 小慈就即刻鼓起勇氣彈!  3 首歌佢話只係手指尾掂到隔離少少錯音, 覺得自己彈得幾好, sight reading 竟然係C major 冇 sharp 冇 flat 好容易彈, Aural 唱歌部份岩晒, 考官阿 sir 聽到笑咪咪喎.... 成績要 7 個星期後先知道, 希望小慈至少有隻 Merit 啦!

請小慈食豐富午餐先再送佢返學, 開心到不得了, 佢話最鍾意同媽媽撐枱腳

讚賞

開學冇耐就要測驗, 小慈六年級要呈分試, 暑假都不敢怠慢努力補習, 所以小慈對今次測驗好有信心!  我都好希望佢有好成績, 付出咁多努力好想佢有回報, 特別係佢科數學....

老師非常勤力, 星期五測完驗星期一已經有卷派, 好可惜, 小慈科數仲差少少, 不過中文科就大躍進, 由 6X 分一跳就跳到 84.5, 仲公開俾中文老師稱讚, 小慈開心得好緊要呀!!!  咁開心梗係要慶祝下, 請你食豐富早餐 ^^

獎品梗係少不免啦, 除左中文, 科學都考到隻 A, 俾小慈任揀禮物, 點都係鍾意公仔!  咁多隻揀邊隻好呢?

粗心大意的小明只得科學一隻 A, 同禮物擦身而過, 點知小狗仔買二送一, 無端端益左小明!  小慈家姐真係太錫你

買柴犬竟然遇見柴犬!  驚喜合照!  估唔到真柴犬都鍾意玩柴犬公仔, 勁撲上身攪到小慈小明唔敢低 D 同佢影相

小慈揀左呢兩隻, 已經改名 「豆豆」同「大佬」, 放佢地係草度影相, 超靚!  小慈用左黎做電話 wall paper ^^

如果 12 月呈分試都有呢個成績就掂晒呀!  小慈努力!!!

爸爸生日在星期日

今日係爸爸生日, 兩隻小寶貝一早神神秘秘係度寫咭, 再攝手攝腳入房送俾仲係大覺瞓中既生日壽星公 ^^

生日快樂!!  We love you~~~

當守聖日, 星期日生日當然都要返教會啦!  不過小慈今日要補堂, 之前 3 次打風都係星期日, 無可奈何要今日補番, 於是我地一家一齊返早堂再飲住茶黎等小慈放學, 兩父子的共同興趣....

有鑒於爸爸個肚腩越來越大, 我地決定送份大禮俾佢 -- 全家一齊踩單車!  出一身汗有望個肚腩變細, 延年益壽身體健康 ^^

呢個蒲崗村道公園, 小慈小明上次黎仲係踩緊三輪車

而家兩個都識踩單車了!  呢個圈用黎做熱身同埋練習閃避 BB

做好熱身, 我地出發去高架單車徑

與高樓大廈擦身而過, 腳底下車水馬龍, 好爽呀!

成條高架單車徑分 4 區, 呢個 C 區上斜最辛苦, 但 D 區衝番落斜就爽爆!  真係要付出先會有收成

踩完兩個鐘單車都話唔夠皮, 要周圍參觀呢個公園

小慈展示佢既柔軟筋骨

隨時都可以一字馬問你服未!

小明何事擊鼓鳴冤?!

出咁多汗, 係時候要食番餐補充體力, 肚腩呢家野都係等佢自然流失啦 >v<

壽星公話要食生蠔, 我搵到呢間 Oyster Station 晚市都係 $10 隻蠔, 超抵!!

小慈小明都話要食, 我地 order 左 35 隻!!!  今晚既南非生蠔又厚肉又 creamy, 非常好食呀!!!

仲有試左美國車厘蜆, 唔係成日有, 赤貝、泰式生蝦、肉眼扒、prama ham 連薯條都好好味呀!!

生日點少得吹蠟燭?  餐廳幫我地預備左甜品當蛋糕, 好有心思!

生日快樂!  身體健康!!  我地最愛既爸爸  ^8^

Love you!

小白鷺餐廳水上樂園

真係 N 咁多年冇黎過小白鷺餐廳喇!  再次到訪, 小慈小明興奮到不得了!

依然有幾檔賣小玩意, 兩姐弟對隻貓最有興趣, 不過見佢瞓緊覺就唔敢摸

山羊!!  山羊!!  小明最掛住呢度既山羊!  冇見幾年, 開枝散葉家族龐大, 由幾隻變成而家幾十隻, 唔可以再餵佢地食草, 要買 $10 一包既紅蘿蔔仔

小白鷺餐廳周圍裝修過, 靚左好多呀!

多左個大草地!  兩姐弟展示軟骨功又玩側手翻, 不亦樂乎

我地今日之所以到訪呢度, 完全係因為佢

Aqua Park, 我叫佢做水上樂園, 小慈小明叫佢 Running Man  :D

換好泳衣, 準備落場了!  $516 / 2 個小朋友玩 2 個鐘

一定要著救生衣先可以玩

小慈玩緊水上千秋, 型爆

小明玩緊滾筒, 佢話爬得快 D 水係會照頭淋, 好好玩

「好玩呀!  好好玩呀!  」聲此起彼落, 媽媽見到你地開心就最開心!

出年再黎過!

昊昊的月餅生日會

今年中秋節, 姑媽話我地屋企天台可以玩蠟燭, 於是決定黎我地屋企做節

今晚食物非常豐富, 打邊爐 and 爐端燒打孖上 ^^

第一次在天台玩燈籠, 點蠟燭

傻瓜小慈

好大風又有小小雨, 成班要圍住個火唔好俾佢熄

小慈點左 11 支蠟燭叫昊昊吹當慶祝生日

仲用生日蠟燭插月餅賀昊昊生日添, 笑死

驚喜地送上生日禮物, 昊昊好開心

今年又有 handmade 月餅食, 超正!