對於基督徒黎講, 聖誕節真係普天同慶, 全年最開心就係呢一日! 主耶穌道成肉身降生於世間為著拯救萬民, 諗黎諗去都唔明白主耶穌點解要咁做, 就算你好愛你屋企隻貓, 你點都唔會將自己變成一隻貓去進入佢既世界黎同佢經歷一生啦?! 所以, 主耶穌對我地既愛真係多得難以想像, 聖誕節係佢生日點可以唔同佢慶祝呢?
今年我地積極參與教會舉辦既所有聖誕活動, 12月23日打響頭炮, 我地去兩個商場報佳音, 第一站去 Mikiki ^^
呢個商場俾我地係咁靚既 Thomas 車前面唱詩, 吸引好多觀眾呢!
報佳音主題 「誰是主角」, 非常好聽既一首詩歌, 聖誕節係慶祝主耶穌降生, 還是紀念身穿紅衣既聖誕老人?
第二站我地去到九龍城廣場, surrounded by Miffy 仲有個高台, 正! 小組獻詩有把聲靚到不得了既婷婷姐姐同 Hansen!
仲有彈琴出神入化既 Eddie 哥哥, 佢不停鼓勵小慈努力學琴, 將來教會既司琴就輪到佢接棒 :)
文牧師黎撐我地場呢 :)
Good Show!!
對上一次聖誕報佳音已經係 3 年前, 真係企係條街度唱, 小慈仲係好細個, 弟弟直頭未夠稱唔俾唱住添
12月24日平安夜, 我地參加聖景演出, 小慈今年反串做約瑟, 小明做三博士
綵排、換衫、set 頭、化妝.... 非常忙碌的一班小演員
小明博士與反串約瑟整裝待發準備出場, 小慈小明同台演出 ^^
講岩晒所有對白又走岩晒位, well done!!
型仔三博士
今年我地仲有 choir, 所有場景配合聖詩由兒詩及初詩唱出, 超正!
辛苦晒所有台前幕後既工作人員, 好正呀!
呢幾年都有參與聖景, 感恩佢地有機會演繹不同角色
睇番 D 相就覺得小慈小明大左好多 :P
聖景之後既平安夜晚會, 估都估唔到小明中左壓軸大獎!! 非常驚喜!! 得獎者要上台唱歌先有得領獎, 笑爆全場 ^^
我地提摩太團今晚出左好多幸運兒, 嘉良叔叔一家中 3 份都超厲害!! 感謝天父!
12月25日 聖誕節@星期日特別開心, 返教會崇拜, 小慈小明初級詩班特別獻詩
獻唱 "Jesus is Born" Yes!! Jesus is Born!!!
詩歌非常好聽, 佢地個個戴晒聖誕帽超級可愛 ^^
在自己佈置既聖誕樹前留影, 十分有紀念性 :D
之後就係我地提摩太團一年一度既聖誕 party 喇~ 人才濟濟
有美食, 火雞脾好有咬口, 秘製通心粉好味到幾大煲都食得晒!
玩遊戲, 朦眼畫番對方五官, 火柴人出晒黎 @.@
玩口嗡嗡當秘笈, 我地係估聖經金句, 廣東話同音異字太多真係笑爆嘴!! 超好玩既遊戲, 多謝 Keynes 叔叔同 Gienna 姨姨預備 ^^
今個聖誕太快樂了!!!
