遠近慈明: 7月 2016

2016年7月31日星期日

兩姐弟

一直都好感恩, 多謝天父俾我有兩個小朋友!

陀住弟弟既時候好想佢係女, 生怕佢係曳仔惡教, 於是日日祈禱求天父俾佢兩個能夠相親相愛, 彼此能夠做一世既好朋友~

上帝聽禱告! 小慈好錫呢個弟弟, 就算俾多個妹佢都唔要, 話弟弟可愛 D! 弟弟亦都冇想像中咁曳, 係一個好可愛既仔, 經常爆笑係我地全家既開心果

望住佢兩個真係好開心, 一杯思樂冰兩份分

弟弟已經係打機既天才 (邊個男仔唔係?!), 無畏無懼咩都夠膽試又真係成日俾佢發現到秘技, 勁到連小慈家姐都搵佢幫手, 就出現「專業槍手」呢個場面 :D

爸爸考試前秘密地買左副模型, 一直等佢地有一日唔駛人勞氣先攞出黎獎佢地, 點知一直等一直等, 足足 2 個月, 小慈小明先符合乖既條件, 終於有得玩

製成品, 好靚仔啊~

弟弟呢幾日無端端發高燒, 問小慈家姐可唔可以瞓佢對大脾休息下, 勁錫弟弟既小慈毫不吝嗇借出佢對香雞腳仔, so sweet~~~~~~

家姐讀故事書俾弟弟聽, 阿媽從此可以收山, yeah!

架巴士走左..... 兩個決定慢慢行, slow motion 中 >v<

一個跳中國舞, 一個學 Chinese Kung Fu, 兩個都要經常拉筋, 互相幫助中

同哭, 同笑, 同踏過每個歲月嚴寒! 要一直相愛啊!

2016年7月30日星期六

英國體操協會 5 級章別試

唔學唔知原來章別試半年考一次, 由最低 7 級一直考上去, 不經不覺小明而家考 5 級喇!!

見佢係屋企都冇咩點練, 問親佢都話識, 又話 D 動作要同人合作先做到, 咁好啦, 見你咁有信心做阿媽既都唔多嘴了!

終於, 結果出爐, PASS ^^

叻仔呀! 我最鍾意 D 興趣班唔駛屋企人加以輔助但又有成果的了 :D

努力加油! 小明滿有雄心壯志話要考到 1 級!!

2016年7月29日星期五

假期聖經學校 2016

一連 5 日既假期聖經學校, 今年主題「紅‧線索」, 徵用提摩太小團友做生招牌, 小慈小明榮幸當選當正自己係主角, 不經不覺已經完滿結束, 今年又破紀錄, 淨係小朋友都 116 位呀!!

第一日玩競技遊戲, 第二日做手工, 第三日做廚師, 第四日玩攤位, 第五日結業禮, 節目豐富!!

小明讀中小恩慈班 (幾時都同家姐一齊 :D)

小慈入讀高小溫柔班, 唔知幾時先會恩慈讀恩慈班呢?

今年小廚師整既三文治卷好好味喎~

大頭相

小慈整飯團, 搓得好圓呀佢 ^^

攤位遊戲

小慈小明話呢個風扇好難控制

結業禮集合台前幕後再加所有小朋友, 陣容真係好鼎盛!!

小慈準備表演手語金句

爸爸今年升左職, 由家長觀禮變成控制室技術員 ^^

導師連姑娘慧眼識英雄頒左個「最溫柔大獎」俾小慈 ^^ 楚珊姨姨就話小明係「最堅毅不屈」大獎既得主 :D 辛苦晒咁多位導師!!

開心到攞埋紅線八爪魚仔返屋企陪住瞓

我到假期聖經學校, 真係快樂無比~

2016年7月28日星期四

每年都會睇話劇, 不過小慈小明開始興趣不大, 話鍾意睇電影多 D 喎! 都好, 睇話劇貴好多架呢!

不過今次呢一套「甜路由我創」音樂劇, 主要演員係一班有學習困難既幼中小學生, 主辦機構循道衛理觀塘社會服務處希望透過戲劇訓練, 幫助佢地改善專注力、自我管理能力、社交溝通能力及團隊精神, 佢地唔係專業既演員, 但付出既排練時間唔比人少, 有勇氣上台表演盼望得到大眾認同, 咁有意義既話劇, 我地梗係支持啦!!

故事由英國兒童文學原著《 Charlie and the Chocolate Factory 》改編, 講述 5 位有異於常人既小朋友 -- 柏芝拉姑驕傲自大、肥媽肥龍貪心貪吃、高 B 為人算死草、琪琪專蝦家姐晴晴、查理與爺爺心地善良最正常, 佢地幸運地得到入場券進入朱朱朱古力廠, 經歷一段改變人生既奇幻旅程.....

約埋好朋友冬晴柏苗一齊睇話劇

小朋友鍾意一齊坐

竟然撞到朋友仔! 祖堯同小明同年同月同日生架 ^^

演員謝幕

贊助之一蘋果都有報導 2016-8-9

【本報訊】暑假對學生來說，是玩樂的好時機，不過有一群學童，今年的暑假過得別具意義，他們於上月底參演了3場，改篇自英國文學名著，朱古力獎門人的音樂劇——《甜路由我創》，並獲蘋果基金贊助。劇中部分參演者，有特殊學習需要，主角之一的燁明，更有讀寫障礙及專注力不足，他最終排除萬難，成功在舞台上發光發亮。

「台上一分鐘，台下十年功」，對這40位小演員來說，雖然只用了3個月時間綵排，但公演一刻的風光背後，藏著不為外人道的辛酸。因為部分演員，有特殊學習需要，例如：讀寫障礙、社交困難、專注力不足、過度活躍症等。

今年9歲的楊燁明，有著圓圓的臉蛋，跟愛吃的性格，因此被導演相中，讓其飾演其中一位主角，同樣愛吃的「肥龍」，燁明同時患有讀寫障礙及專注力不足，對他來說，要記熟每句對白，絕對要比其他人多付出幾倍的努力。

「好緊張，導演話唔記得台詞，就講啲自己記得嘅，觀眾唔會知。」人生的首場演出，零經驗的燁明，難免膽怯，跟平日滿場飛的「馬騮仔」模樣，大相逕庭。演出中段，更一度忘記台詞，全場靜止達十秒，幸最後得身旁演員提醒。

即將升讀5年級的燁明，猶記得幼稚園高班時，經常被老師投訴「坐唔定」，兩年前接受評估，證實患有讀寫障礙及專注力不足。受讀寫障礙影響下，燁明閱讀時會跳字跳行，書寫時，若遇上生字結構稍為複雜，甚至會左右調轉，因此中英文成績欠佳。

由於燁明總是坐不定，因此每當溫習跟做功課，父母總在旁監督及協助。訪問當天，燁明閱讀中文書內的文章，遇到「叢」、「躲」、「體」等，有左右結構的生字，腦子一時轉不過來，需父親在旁提醒。楊父坦言，最初不懂教導方法，只會打罵，「試過一次做功課，由放學做到夜晚12點，好炆，大聲鬧佢，佢畀人鬧又唔開心，又喊」。依偎父親身旁的燁明不禁說：「最唔鍾意人話我蠢！」

楊父後來向社工求助，學會用讚賞的方法，鼓勵燁明學習，如今燁明的數學成績不錯，也愛唱歌，楊先生望社會放下歧見，「其實佢哋同一般的小朋友一樣，唔需要覺得佢哋與眾不同」。也許，他們不能贏在起跑線，但在人生的舞台上，依舊能發光發亮。

你地成功左喇!!

2016年7月24日星期日

招待司事

填左張願意參與教會事奉表, 冇咩技能既我, 被教會邀請幫手做招待 ^^

每個月既第四個星期日, 我同秋秋就要著到靚一靚咁返教會幫手喇~~

已經收左封聘書, 招待司事有名牌, 程序表仲會落埋你名添, 突然覺得自己好尊貴!!

當樂意事奉主, 多認識弟兄姐妹!!

2016年7月22日星期五

寄養

好鄰居去左旅行, 知道我地屋企都有養龜就將佢地兩隻龜寄養我地屋企

小慈小明對呢兩位新客人簡直給予貴賓式既招待, 竟然親自換水洗缸餵養!! 嘩~~ 我係 Jimmy 都呷醋呀

三龜相遇!! Jimmy 駛出一招大龜展臂震住個場, 你兩隻小龜醒醒定定過客黎架咋!

2016年7月17日星期日

滑水梯泳池

之前睇過介紹話香港有 8 大精選游泳池, $19 就可以平玩滑水梯, 其中一個泳池有 4 條高 9 米既滑水梯, 速度又快又刺激, 仲有得欣賞吐露港海景! 泳池設施又十分齊全, 有主池、訓練池、2 個習泳池及 3 個嬉水池等, 講到咁正, 聽到小慈小明嘩嘩聲, 再加埋之前學校水運會係度舉行, 小慈望住呢 4 條滑梯但又冇得玩, 返黎就日日問我幾時可以去 @.@ 見天氣咁熱今日又冇咩做, 一齊去游水啦!

今天是快樂的星期日, 大家既心態一樣, 於是泳池門口大排長龍實施人潮管制, 有出先有入, 第一次見到 Swimming pool is FULL 既標示, 入場人數已經 822 人, 真係有 D 嚇親...... 一場黎到照排隊啦, 穩定軍心同小慈小明講我地玩到泳池 6:30 pm 關門先走, 游 3 個鐘夠晒皺皮架喇, 佢地先放心

真係好多人不過無損小慈小明心情, 見到水已經興奮得很, 帶左好多玩具黎玩

第一時間跳落水

小朋友嬉水池有小明至愛大笨象

真係小明先諗到帶埋 D 壽司黎游水, 引晒好多 BB 埋黎 :D 小明利用噴水喉當壽司係炮彈咁射出去再鬥快執番, 俾佢笑死 >v<

就係呢 4 條 9 米高又快又刺激既滑水梯! 可惜有高度限制, 小明未夠 130 cm 就算識游水都唔俾玩 v____v 好! 就等媽媽同小慈家姐幫你玩晒佢地 :D

泳池全景, 呢度真係好正呀!

游完水最爽就係食杯雪糕啦 ^^

透心涼~~

2016年7月15日星期五

一年一度海洋公園

暑假要去海洋公園, 絕對係需要深思熟慮! 首先要揀天氣, 去廣闊空曠既地方如果仲要暴曬, 係會死人既 @.@ 第二要揀時間, 雖然話旅遊業踏入寒冬, 但我相信旅行團少極都仲係有啦, 於是, 我地揀左星期五請假去以避開星期六日一定人逼 :)

落左成個星期雨既今日, 天氣報告話太陽前面有舊雲, 仲唔係最理想既天氣? 小慈小明再向天父祈禱, 希望唔好落雨, 有太陽但又唔好曬, 仲要有風! 有呀! 有呀! 上帝聽禱告呀! 我地出發喇~~~~~