小慈 10 歲了!!

10 歲喇!  10 歲喇!!  小慈 10 歲喇!!  一早唱生日歌叫醒小慈返學, 矇矇鬆鬆時同佢做個感恩祈禱, 多謝天父保守看顧帶領小慈十年!  未來的十年、廿年、三十年及往後的日子都求天父拖帶小慈不偏行己路一生跟隨主, 繼續俾小慈做個人見人愛、常常喜樂的好孩子!  話畢一齊阿門, 小慈就攬住我條頸係咁喊, 話好感動呀媽媽~~~ ^^  感恩祈禱之後, 小慈想我好似抱 BB 咁抱佢出去食早餐, 咁就梗係得啦乖女, 媽媽手臂仲有力而你又咁輕飄飄, 10 年來只係養到你得 50 磅, 簡直身輕如燕!

雖然正日要返學都俾住 D 驚喜先 ^^  係你面前有 4 份禮物, 一份爸爸送既, 兩份大小禮物係媽媽送既, 仲有一份係 Joey 姨姨送既, 想唔想而家拆?  拆又拆邊份先?  小慈係揀左而家拆爸爸份摩天輪音樂盒先, 梗係有你心啦, 音樂係你最鍾意既卡農黎架 :)  心思思, 好事要成雙, 小慈要拆埋我份大禮物!  梗係得啦, 之前專登問過你想要咩生日禮物, 估都估唔到你想要彈彈筆盒  @.@  唔鍾意公主既你, 呢個彈彈筆盒都真係幾難搵下, 仲要搵埋配件等你一打開個筆盒就應有盡有, 好有心思架!  開心得你即刻帶左個新筆盒返學, 記住要專心上堂唔好掛住彈呀!

放學返黎梗係趕住拆埋餘下兩份禮物啦 ^^  估唔到 Joey 姨姨咁重手, 買左部即影即有相機俾你, 小慈好驚喜  :)  未研究到點影因為我地要趕住出街食飯慶祝, 最鍾意食飯走來走去既你地, 生日梗係食 buffet 啦!

兩姐弟無端端瞓梳化話要玩獎門人遊戲 -- 鬥快將額頭既脆餅利用面部表情移去個口度食左佢, 笑死我喇  >v<

好味!  小慈好規矩咁食晒頭盆、湯、飯菜同埋雪糕, 小明就一如以往每餐都必定要食白飯, buffet 都唔例外

生日點少得蛋糕, 蛋黃哥係小慈自己揀架

Happy Birthday to our 小慈!!!

最快樂就係自己點蠟燭同埋吹熄佢, 玩到停唔到手

弟弟當然有份叨光啦, 成個蛋糕都係佢地 D 口水  v_v'

今年好特別, 小慈第一次收到咁多同學仔送既生日禮物, 份份都好有心思, 有 D 仲係自制既添!  證明小慈人緣好好, 媽媽好開心呀!

仲有姑媽送既靚衫同埋爺爺俾既大利是

爺爺親手寫既祝福

預早一個星期日同小慈慶祝, 問小慈想去邊度玩, 任佢去!  估唔到小慈只係想去踏單車、一家人玩大富翁、食爸爸整既煎倉魚同埋食日本火煱.... 真係冇估到, 10 歲大生日小慈既願望我可以用卑微黎形容!!  問小慈點解唔講去海洋公園呀?  南丫島呀?  迪士尼都可以去架噃!  點知小慈答我：「我唔想爸爸媽媽徙錢呀!」  小慈真係好乖, 好生性, 好為人設想!  咁乖咁抵錫, 我地梗係即刻滿足你所有願望啦!  爸爸仲自製左支自動彈槍送俾小慈, 手工精美又好玩, 好勁呀爸爸!

10 歲的小慈, 爸爸媽媽祝你十分喜樂, 十分健康, 十分漂亮, 十分得意, 十分大方, 十分得體, 十分多才, 十分多藝, 十分愛主, 生命十分精彩!!

我地真係好錫你呀!!!