觀塘海濱花園

上次黎觀塘碼頭發現呢度靚左好多好多, 於是今日又借機會黎玩!  大大舊烏雲好似準備落雨, 但水好清, 仲有涼涼的風十分舒服, 成班小白鷺企晒係石躉等捉魚, 仲有一隻岩岩飛緊, 睇唔睇到呀?

成個海都係魚仔, 小明睇到唔肯走

仲好有興趣睇伯伯用高筋麵粉、雙魚鈎咁釣魚做晒小幫手, 伯伯好開心, 差 D 送晒成兜泥猛俾我地今晚加餸

呢件小象衫本來係小慈既, 而家轉手去到小明度成為佢既至愛

氹氹轉既奧妙之處係「轉」, 但小慈同小明兩個係鍾意「推」, 每次有小朋友上落都必定指揮人坐邊個位, 連大人話要坐佢地都冇炸形, 推到身水身汗推成大半個鐘頭, 非常有服務人群既精神

終於肯玩下其他設施

玩到太陽出來了

呢條觀塘海濱長廊真係好舒服

正經可愛

岩岩有兩舊雲係小慈上面, 好攪笑　

可愛的小慈

髮之舞

休憩草坪, 有風有雀仔唱歌, 陽光又唔猛烈, 真係好舒服

草地隔冇幾遠就有遊樂設施, 仲好新奇添

究竟係爬上定爬落呢?  兩邊都好難

呢個叫 x-wave 好好玩

小明準備跳落黎, 佢個表情笑 c 我喇~~

考平衡力

等到頸都長終於有噴霧玩了!

甜品時間

佢地最鍾意食既焦糖燉蛋

秋天真係好舒服呀!

音樂會

琴老師每年都俾機會學生表演, 非常鼓勵學生當眾演出汲取踏台板經驗, 始終表演同係屋企練琴唔同, 上台既經驗咁難得一定要支持啦!

一年一度音樂會本來係科學館舉行, 點知 10 月都仲會打風, 科學館為安全計 3 號風球要取消, 大家都好失望.... 不過, 琴老師好快就搵到新場地舉行音樂會, 雖然冇科學館展覽廳咁靚, 但大家都好興奮, 好想上台表演呀!

今日隆重其事打扮到靚一靚架 ^^

就係呢個台喇!  我地早到, 一個人都未有, 好心急呀  :)

小明第 1 次公開鋼琴表演仲要第一個上台!  平時嬉皮笑臉既佢都識得緊張, 不過彈岩晒, 好叻仔呀!!

小慈已經係第 3 次上台表演, 今日亦唔係甚麼比賽, 但呢位小朋友緊張到彈完雞咁腳就想走!  其實你彈得好好好好聽, 發揮得好過係屋企練琴好多, 又有大細聲又有感情又彈得溫柔, 應該留係個台度接受大家既掌聲丫麻!

所有既演出者大合照, well done 呀!

多謝 Miss Sukey 既教導, 睇見佢地有進步, 最開心既真係莫過於老師

聽出耳油, 出年 encore!!  齋睇相係唔夠既, click 下面條 link 欣賞小慈小明既精湛演出啦~~~

click_Music_Concert

老公生日

人地話十年都唔逢一潤, 我係十九年先整劑杰躂躂既野 --  搬 office!!!  唔搬由自可, 一搬, 積聚咁多年既野真係唔講得笑, 我 OT 左 2 晚, 星期六又 OT 全日叫做勉強攪得掂, 執 50 箱野真係執到腰酸背痛手指不能伸直.... 不過, 今晚係我最愛既老公生日, 我點都唔可以再 OT 要準時飛身出去同佢慶祝大日子 ^^

老公話要試新野, 我地去食 buffet, 一開始就用鵝肝當蛋糕同秋秋慶祝~

懷舊之夜~  今晚餐廳有個 display 係大排檔摺櫈, 幾想坐呀!  每位賓客送一隻當造大閘蟹, 仲有大量咸濕小食、雞蛋仔、碗仔翅、牛雜都有供應, 甜品更加有山渣餅、吱吱冰、大白兔糖等, 好攪笑呀!

呢支並唔係珍寶珠, 係冰糖壺佬呀!  秋秋好欣賞佢入面粒新鮮山渣一早起左核, 讚!

工作實在太辛苦, 我地今晚決定食到酒店 last order 先返屋企氹下自己開心.  冇成家人一齊切蛋糕, 小慈有 D 替爸爸不值, 好傻瓜豬, 大人唔會好似小朋友咁年年切生日蛋糕啦!  於是, 好有心又錫爸爸既乖女自製左張生日咭送俾爸爸, 仲神神秘秘一早叫我地簽晒名添架 ^^

小明冇野送, 扮嬌嗲咁哄下爸爸, 黐身黐勢又索吻, 笑 C 我啦!!

Happy Birthday my Sweet Sweet Husband!!  最緊要身體健康, 長命過我 :)

尚武週年慶祝

小明學武剛剛一年, 咁岩就係尚武成立一週年既日子, 可以同埋其他藍精靈一齊慶祝實在太高興了!  入場就簽個名先 ^^

梁師傅同鄧師傅係今日既大會司儀, 快 D 搵個位坐低啦!

中心今年大豐收, 受多個團體邀請表演, 亦接受報紙雜誌訪問, 比賽又獲獎無數, 超勁!

中心培育多個學員加入香港代表隊, 師兄師姐們為大家即席表演

頒獎時間~~  小明無端端有二級課程證書, 好驚喜

陳師傅頒獎

會場有好多藍精靈 BB, 師傅俾佢地先去波波池玩, 其他小朋友即刻問點解佢地冇得去?  師傅就問你係咪 6 歲以下丫, 6 歲都可以玩... 跟住突然大叫:「恩明, 你都係 6 歲喎, 你可以去玩波波池呀!」攪到小明好尷尬, 二年班但仲係6歲既佢覺得自己好大個架麻!  明明想去波波池都唔敢郁, 賴死係度玩集體遊戲, 準備玩 limbo walk, 習武既佢地身體都幾柔軟, 不過個個都唔識拗腰, 膝頭跌晒落地

抽獎!  我地..... 後面個個中獎

小明最愛既三位師傅, 今日超級靚仔

仲有小倩姐姐同師姐, 香港既明日之星

藍精靈大合照

連埋家長們既大合照

小明, 努力呀!  將來你係武術界都可以攞好多獎牌架!

小明甩牙記

話說今晚沖涼, 小慈家姐發現弟弟心口有血, 奇怪之際弟弟自己吐左隻牙出黎!!!

6 歲 10 個月大既郭小明終於甩左佢人生第一隻牙喇~~~~ ^^

由小慈家姐 6 歲 8 個月大開始甩牙, 弟弟已經開始羨慕, 成日覺得自己都係一年級開始甩牙, 點知等左成年, 同學仔一個跟一個咁甩牙, 差不多全班最細既佢, 到二年級開學先開始有隻牙鬆鬆地, 得閒又頂頂佢, 用手又搖下佢, 但點都唔肯俾爸爸同佢剝話要等佢自然脫落, 堅持第一隻要等佢自己甩, 之後去牙醫度剝牙先唔驚喎 (好奇怪既理論) @.@

呢隻右下顎門牙都捱左個幾月先肯甩!!  雖然都發生得突然, 仲要發生係廁所, 弟弟係開心到係廁所大叫 :「我甩左隻牙呀!!!」 邊度會諗到沖沖下涼會甩牙先得架?

甩牙有雪糕食係不成文規定, 終於俾弟弟恨到啦 ^^

遲小慈家姐 2 個月, 都係甩右邊牙仔先, 後面隻恆齒已經出左黎, 一隻大頂兩隻細, 左下顎門牙都鬆鬆地, 好快就做冇牙公咯  :)

5 級模擬考試

為跳舞可以去到幾盡?

都真係幾大犧牲架, 雖然上堂時間只係一個半小時, 但我地住得遠, 一來一回就冇左半日!  小慈學業成績麻麻地, 加上佢手腳慢, 平日做功課已經冇晒時間, 好幾次都想把心一橫 quit 左跳舞留係屋企每個星期多半日溫書幾好丫, 點知小慈唔捨得, 再加埋有家長勸我, 如果讀書麻麻更加要跳舞, 將來 profo 都有野寫咁話.... 都係既, 事在人為, 唔能夠遇到困難就放棄

考試前有模擬考試, 為左呢個 mock exam, 小慈犧牲左一次團契 outing 既機會, 撞左時間冇得去大埔好出名既樹屋玩, 為左令佢冇咁唔開心, 我地全家都冇去黎陪佢  >.<

5 級中國舞真係唔講得笑, 我真係覺得呢班妹妹跳得好靚, 一字馬話落就落, 拗腰踢腿走位一絲不苟, 動作優美, 仲要笑住跳舞真係好好睇!!  小慈話佢今日個 look 成個 Pucca 咁, 學埋佢依起棚牙其實笑到嘴角震晒 ^0^

轉眼間小慈已經大個左咁多, 手腳又細又長

小慈, 加油呀!  睇住你進步媽媽其實好開心, 唔係你一個人跳舞, 全家都陪緊你架, 努力呀!!