老公生日

人地話十年都唔逢一潤, 我係十九年先整劑杰躂躂既野 --  搬 office!!!  唔搬由自可, 一搬, 積聚咁多年既野真係唔講得笑, 我 OT 左 2 晚, 星期六又 OT 全日叫做勉強攪得掂, 執 50 箱野真係執到腰酸背痛手指不能伸直.... 不過, 今晚係我最愛既老公生日, 我點都唔可以再 OT 要準時飛身出去同佢慶祝大日子 ^^

老公話要試新野, 我地去食 buffet, 一開始就用鵝肝當蛋糕同秋秋慶祝~

懷舊之夜~  今晚餐廳有個 display 係大排檔摺櫈, 幾想坐呀!  每位賓客送一隻當造大閘蟹, 仲有大量咸濕小食、雞蛋仔、碗仔翅、牛雜都有供應, 甜品更加有山渣餅、吱吱冰、大白兔糖等, 好攪笑呀!

呢支並唔係珍寶珠, 係冰糖壺佬呀!  秋秋好欣賞佢入面粒新鮮山渣一早起左核, 讚!

工作實在太辛苦, 我地今晚決定食到酒店 last order 先返屋企氹下自己開心.  冇成家人一齊切蛋糕, 小慈有 D 替爸爸不值, 好傻瓜豬, 大人唔會好似小朋友咁年年切生日蛋糕啦!  於是, 好有心又錫爸爸既乖女自製左張生日咭送俾爸爸, 仲神神秘秘一早叫我地簽晒名添架 ^^

小明冇野送, 扮嬌嗲咁哄下爸爸, 黐身黐勢又索吻, 笑 C 我啦!!

Happy Birthday my Sweet Sweet Husband!!  最緊要身體健康, 長命過我 :)