柏橋生日會

大個仔大個女已經唔要麥當當請小丑魔術師開生日會, 多謝柏橋邀請今日去一個好特別既地方開 Party!

一到場就要戴重裝備

reload gun

Open Fire!!

倉鼠波大對決

小慈負責守龍門

要揹住個倉鼠波射足球真係一點不容易, 個波係腳底都睇唔到, 玩到小明大汗疊細汗

好型呀!  仲有得射箭呀!

小明手仔未好番晒冇力拉弓, 但見佢插晒 D 箭係背脊真係笑死我喇 :DD

呢度仲可以玩 UNO

同埋打機

更有夾公仔機, $5 夾一次就俾左 $20 小慈小明玩下

真係夾到啊!!  小明開心到不得了, 勁有成功感!!

俾多次機會小慈都夾到, 仲有補中時間, 小明夾多隻勞蘇添!

有得玩, 有得食, 仲有公仔帶番屋企, 多謝晒柏橋!  祝你身體健康, 聰明伶俐, 年年開 Party!!!  Happy Birthday ^^

母親節加公眾假期

今年的母親節同公眾假期疊住, 星期一都係紅日, 連續兩日放假好 high 呀!!!

今日返教會做會眾, 因為我同小明小慈都唔駛獻詩, 任務由我地最細個最可愛既兒童詩班負責, 佢地唱改左歌詞既快樂頌, 更向媽媽致謝, 多謝媽媽幫佢地洗杯洗碗, 好可愛 ^^

仲有婷婷獻唱 當你老了, 陶醉在美妙歌聲之際, 原來台的另一邊有化左老妝既嫲嫲!  即時更投入到歌詞..... 當媽媽老了.....

辛苦晒特別獻唱小組

嫲嫲既妝容真係 100 分, 辛苦你要落妝洗頭先可以慶祝自己的母親節 :)

感謝我的乖仔做手工送俾我 ^8^

佢話得佢一個好小心冇剪斷蝴蝶翅膀, 叻仔!  呢隻係佢最鍾意既青鳳蝶黎架

I love Mommy, Mommy loves me :)

母親節大晒, 我可以揀食咩午餐, 就食 my favorite 之一既日本餐廳啦!  餐廳為母親節特制南非鮑魚仔配自家製醬汁, 好味呀!

每年的母親節我都好感觸, 特別係今年, 我的壽歲就係我媽咪去世時的歲數, 大家都話佢好後生就去左, 我點都想像唔到當佢老去時係咩樣, 亦都冇得我想像....... 媽咪, 你在我心中永遠都有烏黑亮麗的秀髮

Minecraft

估唔到小明鍾意玩 Minecraft 鍾意到自創遊戲!!  佢將所有 Minecraft 既角色畫出黎, 再按照佢地既稀有度, 攻擊力等評分, 跟住就好似啤牌咁玩, 鬥出牌去大人地, 贏得最多牌既就係勝利!

棋盤都設計埋, 好有創意呀!

爸爸又陪佢癲, 見佢副牌唔夠全面就幫佢添 D, 怕佢副紙牌易爛, 仲用電腦同佢整過副, 開心到弟弟傻左!

用咭紙列印就耐用好多啦!  小慈家姐幫手加工

小明仲將呢副心愛既牌同佢好同學一齊分享, 當初副手稿, 吳柏翹同學有份畫架!

玩 Minecraft 時, 弟弟已經不知不覺間學識左好多英文生字, 而家仲識得將心頭好變成玩具, 好叻仔呀!

學習有時, 玩樂有時, 唔會耽於逸樂荒廢學業, 爸爸媽媽通常都會支持的!