我個肚由星期一開始 (17/4) 硬左 3日 (醫生話真係宮縮, 話我個肚細, 又敏感, 所以每一次都 feel 到!) 跟住去到19/4 晚上10:30 開始陣痛, 15分鐘 1次, 11:30pm 就10分鐘 1次, 2:00am 就 8分鐘 1次, 3:00am 就 6分鐘, 到 4:00am, 死忍爛忍本來想頂到天光先入院唔想午夜逃亡, 點知唔掂! 典床典蓆根本訓唔到!! 4:30am 決定入院因為我想聞笑氣! 痛呀! 真係頂唔順呀!
行去威爾斯, 平時行 8 分鐘既路我停左 9 次..... 每次陣痛我就要停低抖陣先, 好在都捱到去醫院! 秋本來話車我去, 我唔制, 點等你又攞車又泊車先得架?! 佢又話截的士 (不過成條街都冇車) 我話上車就俾人鬧啦, 上車唔夠 2 分鐘就到, 玩野呀? 於是我唔理佢自己行, 佢見我行到成隻龜咁, 想揹我又籮咁大個肚, 想抱我又唔夠力! 見佢咁緊張個樣我痛到標眼水都想笑, 當然一笑就又痛啦
5:00am 到威爾斯, 5:30am 入 7E 病房, 姑娘一檢查就話我開左 3 度! 話佢知 10:30pm 開始陣痛, 姑娘已經直接車我落 6 樓產房話我生得!! 仲問我點解唔早 d 入院? 咁忍得痛既? 秋陪我搭 lift 落 6 樓, 跟住唔俾佢入喇...... 嗚~~ 我要老公啊~~~~ 開始驚.....
入到產房又一輪檢查, 知我胎盤低又好緊張, 話我妊娠糖尿又要我滴鹽水, 插支管係我左手背靜脈度, 針位唔係好穩陣, 我一撞到就痛到我飛起!!!! 幾想扯走佢呀!! 6:00am 噗一聲穿左羊水!! 感覺似整穿左個灌湯餃流到成大脾都係, 暖暖地咁...... 姑娘再 check 我話我 3 度半, 話 2 個鐘後先同我再 check, 我頂唔順了, 要求姑娘俾我聞笑氣! 我好似吸毒咁吸, 聞到個人開始 wing, 一開眼望天花板 d 景象係搖晃不定係咁向上既, 好似老虎機 3 條 7 向上轉一樣! 但都唔頂到! 又眼訓...... 一有姑娘經過我實捉住佢既, 今次我要求同我打止痛針, 好似已經 7:00am 咁上下, 不過支針打左都冇知覺, 我仲問姑娘 "打完拿?" 佢地話係時我幾驚呀! 我話不如俾我無痛分娩啦? 姑娘話小慈頭仔低會開得快, call 得麻醉師黎恐怕我已經生左.....
聞住笑氣又一直跟足蠟燭呼吸法 fu fu fu fu, 仲要眼尾望住個鐘, 好想快 d 到 8:00am 等佢地再同我 check 子宮頸..... 8:02am 勒...... d 人去晒邊呀? 我痛到癲喇!!!!!!!!! 開始控制唔到小慈想衝出黎既力! 於是我大叫 "姑娘~~~~~~~~~~"
真係攪笑, 姑娘一埋黎 check 我就話我生得, 叫我腳撐鐵架, 幾個姑娘埋黎真係 get set 幫我生仔, 用布 cover 我大脾?!? 有冇咁兒戲呀? 一直都冇人理我, 我唔大叫都唔睬我跟手就話我生得! 早知早 d 出聲啦! 我仲同姑娘講唔生住呀, 我老公係出面, 佢要入黎架! 姑娘應承會安排, 然後叫我用力 push BB..... 我好想等埋秋, 好唔想生住, 於是第一次唔算太用力 push...
8:15am 終於見到一身醫護人員裝扮既秋秋, 好感動~~~ 秋拖實我, 話我 push 第 1 下就出左個頭, push 第 2 下就出左半個身! 於是唔駛 10 分鐘, 我只係 push 左 4 下
郭恩慈小姐出世了~~~ 重 3.115kg ^^
其實俾塊布遮住我係咩都見唔到既, 全身只係有痛既感覺, 下面仲好似撕裂左咁! 姑娘剪我會陰都冇反應, 可想而知...... 最後只 feel 到有好多好暖既水 be li ba la 咁衝晒出黎, 而痛既感覺突然冇晒, 再望到小慈舉起佢紫色既手指! 聽到佢喊左幾聲, 我既寶貝女咁紫既?? 而秋就不停摸我個頭讚我叻! 生左勒生左勒咁!
"婦人生產的時候, 就憂愁, 因為她的時候到了; 既生了孩子, 就不再記念那苦楚, 因為歡喜世上生了一個人" 約翰福音 16:21
剪左臍帶就舉起俾我睇小慈個樣, 問我仔定女, 跟住放係秋身後既床板上抹乾淨就俾我抱! Hello, BB~~ Welcome to the Earth! 秋同我一齊篤佢面仔, 成身紫色都幾驚嚇呀! 抱一陣就放入暖箱, 32.9 度架, 應該好舒適! 見到小慈手撐腳撐, 又食手指又打呵欠, 好 cute 啊~~ 好想抱住佢呀!
我需要縫傷口, 所以要請秋秋出去, 我叫秋秋去食早餐, 佢都同我一樣捱左一晚, 佢話係產房出面乾著急, 坐又唔係企又唔係, 好擔心我係產房唔知點咁, 又唔俾佢入去, 真係渡秒如年咁架! 係啦, 我都不知幾想秋秋係我最痛既時候可以拖住我, 甚至俾我咬啖咁架麻!
縫針時, 醫生問我有冇做運動? 佢話我生得好快, 又闊又鬆, 本來想唔同我剪會陰傷口既, 因為我生得好好, 但第一胎又搏唔過, 所以剪左 1 下, 有 3cm 架! 我答佢運動梗係有做啦, 預備懷孕之前一星期打 2 次羽毛球, 有左 4 個月開始穩定就做孕婦瑜伽, 唔係對青蛙腳點撐到 4 個鐘而唔抽筋先得架!
終於聽到秋秋叫咪 (佢話我陣痛時都一樣隔半個鐘就係出面叫咪問姑娘我既情況, 不過我一 d 都聽唔到!!) 我即刻問姑娘可唔可以俾秋秋入黎? 佢專登返屋企羅相機, 我好想影全家幅呀! 求左 2,3 次先肯呀~~ 真係好例外架, 冇爸爸可以出左去又入番黎架! 感謝神, 張全家幅不知幾靚~~
跟住, 姑娘俾我餵小慈飲人奶, 一吱就已經有初乳了! 係好似米水咁但又有 d 黃色架! 好神奇! 小慈由 9:45am 飲到 10:00am, 有啜到架, 我 feel 到! 小慈好大力啊~~ 本來想餵埋另一邊但有兒科姑娘黎幫小慈 check up, 話小慈血糖正常, 但背脊有微絲血管爆裂, 唔肯定係血小板低定係出世時夾親, 要抱小慈出去抽血! 噢..... 抽血實喊死死了, 陰公~~
10:30am 先上病房, 即刻大覺訓! 訓下醒下又肚餓, 姑娘俾牛奶麵包但我喉嚨痛吞唔到 @.@ 於是俾粥我食, 又 ok 喎! 終於有 d 野落肚, 喉嚨又冇咁乾~~ 8 個鐘唔俾落床, 我又唔訓得咁多, 實在太興奮了!! 於是姑娘問我想唔想餵 BB? 梗係想啦! 又見到小慈了~~ 佢沖左個涼, d 頭髮冇咁一餅餅, 不過掛住訓唔肯啜我! 姑娘叫我抱住佢一陣再餵, 於是, 我把握機會同小慈影相! 有雙眼皮呀 ^^ 頭髮好黑但好柔軟, 唔通係靚女?!
5:30pm 探病時間, 老爺奶奶都有黎, 秋話佢頭先返屋企係 sofa 由 11:00am 訓到 3:00pm, lunch 都唔食攰到飛起! 大家咁話啦! 奶奶就話我大膽, 痛成咁都行去醫院! 又讚我硬淨, 生完先通知, 真係嚇佢一跳! 所以早放工急住黎睇我咩都冇煲, 見醫院飯餐係食白菜差 d 雙眼反白, 唔俾我食呀! 而家已經係月婆叫我食野要好小心, 唔好冷親!
隔住玻璃窗睇小慈, 話佢面型輪廓似我! 梗係, 女黎架麻, 似媽媽好 d 既! 不過似邊個都好, 最緊要健康快樂! 希望我做到奶媽, 小慈又合作肯飲人奶啦! 生產過程好順利, 又快, 感恩~~~~~~~
第二日, 姑娘就推左小慈係我隔離俾我照顧了
3 日後出院, 我地返屋企喇, 小慈!
每日既工作就係餵奶掃風換片..... 你睇小慈被掃風個樣幾無辜 :DDDD
洗白白, 洗白白, 人人話我好寶寶 ^^
I love you 我最愛既小慈囡 ^8^
沒有留言:
張貼留言