等小慈小姐訓醒食飽先出發 2pm 先到, 第一次租迪士尼 BB車俾小慈, 藍色好靚又大架, 架車長到小慈可以伸直對腳好似好舒服咁
今日酷熱天氣警告 32 度啊..... 一落車已經濕晒, 最好最開心就係玩水
小慈好開心, 周圍行好多野睇已經嘩嘩聲指手劃腳好興奮
我地排隊羅 fast pass 玩巴斯光年, 又 book 小鎮大街餐廳食晚餐, 路過見到 Jessie 又同佢影相
小慈仲請 Jessie 食餅餅添! 見到咁大隻公仔一 d 都唔驚簡直係有我既優良遺傳
小慈對周圍環境非常有興趣, 麻雀仔食爆谷都睇到眼定定, 人仔細細又唔俾人拖要自己行, 見到咩都想摸, 地下有樹葉又執黎研究!
排隊等睇巡遊, 小慈周圍行周圍同人 say hi 又揮手, 聽到音樂又跳舞, 全場人都望住佢笑~~~~
3:30pm 水花巡遊開始, 每架花車小慈都 fing 晒手係咁同人 hi, 指住嘩, 又揮手都冇停過! 迪士尼朋友見佢咁攪笑個個都用水槍射佢, 連白雪公主咁斯文都羅支香水吱佢! 不過小慈好開心, 俾人射到全身濕晒都冇喊仲笑騎騎, 真係好可愛
巡遊一完我地就衝入 Golden Mickey 排隊睇表演乘機同小慈換衫換片片. 小慈心情實在太靚, 又係人群之中穿插, 人地望住佢就同人地 say hi 攪到大家冇佢咁好氣! Golden Mickey 黑暗暗又大聲小慈又唔抗拒喎, 仲睇到好專心添, 不過冇咩表情我估佢係眼訓
見佢唔怕黑又去玩巴斯光年, 我單手攬住小慈單手射槍都有 5 萬幾分, 都叫唔錯啦
Disney 投資既魔盜王今年大賣仲做埋探險世界既 park theme, 連 Mickey 都化身成為海盜呀! 我地同 Mickey 影相時小慈係咁攪佢個鼻又摸佢塊面, 攪到 Mickey 要捉住小慈隻手先影到相
去玩海盜版森林河流之旅
小慈第一次坐船, 望下海, 望下樹, 睇下動物, 小慈將個頭晾左係欄杆度好寫意~~
最後有火又有水咁大製作小慈都睇到冇反應係太眼訓喇
落船放佢落 bb 車就訓左..... 12:00noon 頂到 6:30pm 先訓都算好頂得下啦! 不過半個鐘就醒左
食完飯就玩灰姑娘旋轉木馬
玩玩下突然落雷雨!!!! 係雷雨!!!! 1 小時閃電 3600 次, 氣溫係 15 分鐘之內由 32 度跌至 26 度! 小慈都俾 d 雷聲嚇親添! 唔理咁多玩埋先走, 不過太大雨今晚煙花取消, 少許美中不足但今日都好開心架!
