假疹

唉~~  開心過後, 弟弟病左呀!!  尋日訓醒晏覺已經 38.8度 (即係102度), 以為著得太暖同埋岩岩訓醒所以體溫高 d, 同佢除減 d 衫又冇事喎!  不過都有俾退燒水, 有理冇理食左先講

小慈病左成個星期都擔心弟弟遲早中招, 果然係啦!  成晚弟弟都訓得唔好郁黎郁去又喊 2 聲咁, 半夜仲大喊, 一抱起佢成個火爐咁, 一探熱..... 40.2度 (104.5) 呀!!!!  @.@  嚇到呀媽我即刻暈低咁滯, 即刻俾佢食高燒藥水, 又除衫又換片又抹面!!  弟弟大個左唔肯乖乖地貼退熱貼, 一貼就扯開, 於是我就將塊退熱貼黏係佢背脊, 跟手開支淡奶過佢飲總算訓到天光!  可能係背脊塊退熱貼有效, 7:00 am 同佢探熱又正常番 37 度, 點知準備送小慈出門口返學時又燒番 38.7度!!  咩事呀?  唯有請假送完小慈返學再返屋企同弟弟睇醫生啦

呢個禮拜見邱醫生真係仲多過見爺爺嫲嫲, 係診所探熱又 39度, 越燒越高想點先?!?  醫生一知佢高燒又冇其他病徵, 已經話佢出疹, 我話弟弟 7個半月時已經出左玫瑰疹勒喎, 點知醫生同我講玫瑰疹有 20 種!!!!  @.@  即是出齊可以出 20 次, 統稱 "假疹" 

 

"假疹" 特徵都係高燒, 燒下退下冇其他病徵, 燒幾日唔燒就會出疹, 全身紅色細細點醫生話其實假疹等於我地傷風感冒, 都係過濾性病毒一種, 不過 2 歲以下既小朋友就係會燒完出疹, 尤其係屋企有哥哥姐姐返學既更加會帶多 d 病菌返黎惹到佢 V___V  

醫生有個 patient 就係睇假疹都睇左佢 5 次, 睇下弟弟會唔會破佢紀錄喎!  我叉住你呀!!  醫生冇咩可以做架勒, keep 住幫佢退燒但又唔好凍親佢, BB 對手唔應該係凍既, 大人覺得熱, 但 BB 體積細散熱快會唔夠暖, 所以 check 住 bb 手暖既就 ok!  退左燒出疹就要返黎再睇醫生

唉~~  弟弟你快 d 好番啦!  媽媽幫你 book 左正日影 studio 相, 如果發燒又或者全身出疹咁點影呢?!

弟弟 1 歲生日 Party

萬眾期待, 恩明生日會鐵定 2009 年 11 月 22 日 (星期日) 係家中舉行, 鑑於正日 11 月 25 日係星期三, 翌日大家都要返工返學, 於是就提前慶祝!  

為左弟弟既生日會, 我同秋秋忙左 5 日, 首先係要搵一個出色既 designer 幫我地設計 4 件有相既 Print-Tee & Banner, 估唔到呀舅父仔義不容辭拍心口應承, 行動仲極之迅速, 效果亦都令我地好滿意!!  唔該晒, 好靚呀~~

呢張 banner 入面記載住弟弟由出世到 1 歲既大頭演變過程

之後托姑媽幫我地搵左一間 calendar 公司設計年曆咭, 又係平靚正仲要好方便!  

呢張年曆咭係我地既小小回禮禮物, 多謝大家百忙之中抽空黎參加小明既 1 歲生日會, 年曆咭既相係小慈小明 8 個月大時影既 studio 相, 出奇地兩姐弟真係好似樣!!  聖誕老人裝個張相係小慈黎架, 連工人姐姐都認錯係弟弟跟住我同秋秋就開左 4 晚夜車趕工整左 1 隻 DVD 記錄由我大肚到弟弟 1 歲前既生活相 :)  揀歌, 揀相, 整效果..... 再加埋年紀開始唔細, 晚晚 2:00 am 捱夜真係整得好辛苦, 好在整出黎既效果我地好滿意!  13 首歌全部都有意思, 弟弟你大個 d 就會明白箇中既真諦!!  

除此之外又要精心挑選 party 食物, 鑑於工人姐姐係新鮮人咩都唔識, 要由我親自操刀整沙律 + 沙薑雞腳, 嫲嫲就幫手整佢拿手既豬頸肉 & 炸到金黃色有 hand made 錯覺既春卷, 勁呀嫲嫲!!  最大困難係我要執屋 2日先可以 clear 到個廳出黎放 2 張餐枱擺食物, 間屋由 2 個人住到而家 5 個人住, 真係差 d 要宜室宜居有辦法先攪得掂, 連我都佩服自己收工一流... 係收納工夫一流至真!!  萬事俱備, party 開始!!

今日有一打大人 & 4 個小朋友黎幫恩明慶祝 1 歲生日!  弟弟一早就坐係超等位觀賞自己主演既 DVD  ^^

睇完 DVD 之後, 大家都問我弟弟 d 攣毛去晒邊?  我估係佢 d baby hair 甩得 7788 所以連毛都冇埋!  壽星仔似乎都知道今日有 d 特別, 心情暢快仲即席表演岩岩呢個星期學識既 give me 5, 講好野 / 自己開心就拍手, 叫點虫虫就羅隻手指仔出黎同你點, 氹到 d 姨姨個個笑到四萬咁口, 係最衰唔肯俾人抱, 又做痴媽 B, 抱住佢 2 個鐘手都斷  >.<

小慈話自己唔係家姐仔而係大家姐, 非常有家姐風範咁咀左弟弟好多啖之後同佢講 1 歲要乖架, 飲奶奶要好快架, 我地好錫你架知唔知?

弟弟好 high, 開心到影到佢 6 隻神秘既牙仔

媽媽: "弟弟幾多歲?"   

弟弟: " 1~~~ "   

媽媽: "叻仔!"

Party 開始, 先影張全家幅!  小慈今日好 high, 全日仲做左媽媽既好幫手, 又切生果整沙律, 又幫手 set 枱, 仲識招呼賓客, 肯同小朋友分享佢既玩具, 今日咩都讓俾人地玩先又係咁叫人地食野!  之後仲無端端每個姨姨都派一對拖鞋叫佢地腳仔凍要著住, 氹到佢地好開心, 乖女!

Happy Birthday to Young Man~~~~ We love you very very much 呀仔!

大家都等住同弟弟唱生日歌切蛋糕慶祝

勝在屋企有玩具同埋一條長走廊, 玩車車來來回回都玩左好耐!

弟弟摸住牆行好好笑啊!!

小朋友們自創好多遊戲氹自己開心

多謝晒各方好友送既禮物, 要你地破費真係唔好意思!

份份都鍾意, 多謝晒~~

Model 仔示範戴 hand made 頸巾, 弟弟全日都唔肯戴我頂 Fun to be 1 帽, 如果唔係仲 cute 呀!

逼爆屋企既 1 歲生日會完滿結束, 最開心個個係小慈, party 未完已經問我可唔可以再請姨姨佢地黎玩, 弟弟就由頭到尾都唔知發生咩事, 賓客一走仲即刻訓埋覺添!  攪笑~~

媽媽今日都好開心, 多謝弟弟你俾個機會媽媽同老朋友聚舊呢!

打邊爐

寒流襲港今晚得 12度!  凍成咁, 最好梗係打邊爐啦!  小慈近來好鍾意玩煮飯仔, 今晚俾 d 真野佢玩, 開心到飛起, 不停來回夾食物返黎煮, 出奇地食左好多野

一開始弟弟齋坐玩筷子已經好開心

見我地密密食又唔餵佢就開始鼓譟!  俾舊炸魚皮佢妹左好耐

食到 lam lam 脷, 飽飽就起身行下, 行到攰仲要係 BB 車度訓埋 

乖到不得了呀, 弟弟!

好友聚會

好耐冇同媽媽既老朋友見面, 對上一次聚會我仲坐緊月, 於是今晚就帶埋小慈小明去西田夫人屋企見下人, 點知弟弟今晚要抱住先肯笑, 好痴身!

好在西田夫人屋企成個動物園咁, 又有狗仔, 又有雀仔, 又有魚仔, 兩姐弟玩到笑晒~~

弟弟第一次另類接觸

你睇小慈笑到又要摸, 又要縮 :)  

今晚好多人讚小慈, 話佢乖左好多, 好聽話, 有禮貌, 唔再痴媽 B!!

兩姐弟自己招呼自己之際, 我地大人梗係爭取時間擦番餐

主角老三陽大閘蟹, 出場!  正!!

太好味~~

回家

而家每日最開心就係放工返屋企, 一扭鎖匙已經聽到小慈小明兩個既尖叫歡呼聲!  非常熱烈咁歡迎我地返屋企, 個情景係好攪笑架.....

小慈: "爸爸, 媽媽, 你地返黎拿?  我等左你地好耐喇! 我今日食飯好乖呀......." (下刪數十字) 

跟住幫我除鞋, 攞袋, 有時問我買左咩野返黎, 有時問今晚我地去邊度?....

當小慈口抹橫飛之際, 弟弟亦都已經一邊大叫"呀" (有時係叫媽媽媽媽~) 一邊爬埋黎我腳邊, 拉住我褲腳企起身示意我抱, 呢個時候我就好威猛咁一手拖小慈, 一手抱弟弟咁行入屋, 之所以我而家係有 2 隻老鼠仔就係咁訓練出黎!

抱住弟弟我最鍾意大大力錫佢個面珠 dun!  呢幾日佢學識手指指, 最鍾意指住天花燈, 佢指住我就教佢 "燈燈",  佢指住飾物櫃, 我就教佢入面有 duckie.... 教得幾日, 問弟弟 "燈燈呢?" 弟弟手指指上天花板!  我再問 "Duckie 呢?" 弟弟真係手指飾物櫃!!  叻叻呀, 弟弟!!  媽媽好開心, 我會再教你多 d 野架勒!

抱完弟弟就到小慈, 今日我問佢:

我: "小慈, 今日係學校做咩呀?"

小慈: "食飯啦, 飲水啦, 訓覺啦, 我自己去廁所唔駛老師幫手!"

我: "仲有呢?  有冇學普通話呀?"

小慈: "今日周老師同 Miss Sandra 都冇黎"

我: "所以冇學普通話同英文呀?  咁有冇唱歌呀?"

小慈: "詩歌羅!  梁老師教我地唱 奉主耶穌聖名呀"

我: "可唔可以唱俾媽媽聽呀?"

小慈: "靠著耶穌的名, 靠著耶穌的名, 我們必定得勝, Hey..... 媽媽一齊唱啦" (好在我識唱, 不過歌詞同我識唱個首有 d 唔同)

小慈: "今日紀乎撕左陳老師同郭老師張晴雨表呀!"

我: "咁老師有冇好嬲呀?"

小慈: "梗係有啦, 郭老師有鬧佢, 紀乎喊呀!  唔岩架佢咁樣!"

我: "小慈有冇俾老師鬧架?"

小慈: "我好乖架, 個個都好錫我架! 妙姐啦, 玉姐啦, 陳老師啦, 郭老師啦, 周老師啦, 媽媽啦, 爸爸啦, 弟弟啦, 工人姐姐啦......"

我: "晴雨表要黎做咩架?"

小慈: "話俾我地知今日係天陰羅"

我: "今日星期幾呀?"

小慈: "今日係星期三"

我: "岩喎, 小慈!  咁今日係幾多月幾多日呀?"

小慈: "今日係 2009 年 11月 11日, 有 2 個 11, 一樣架!" 

勁呀!  小慈!!  真係識架佢! 

弟弟嘆茶...... 冇

秋秋每日都會飲茶, 小慈受爸爸影響有時都會要求爸爸俾茶佢飲, 潛移默化定係遺傳, 未夠一歲既弟弟都識要求飲茶, 仲識欣賞!

嗒真 D 有回甘喎

同場加映, 弟弟學識..... 冇

勇敢的小慈

今晚決定去新城市食壽司, 順道去埋隔離既玩具反反城買泥膠俾小慈, 應承左佢既野係一定要做, 衰妹已經提左我地一個星期架勒!

一如以往, 星期日既新城市人山人海, 我地羅左飛仔之後就入反反城行下, 咁岩又有泥膠既 promotion counter, 小慈同個泥膠姐姐係咁整泥膠雪糕, 真係好似!  玩到唔捨得走, 差 d  miss 左張壽司飛, 唯有食完先再返去排隊俾錢買泥膠啦!

小慈都算乖, 入左 2 次反反城都冇要求過我地買其他野, 雖然佢見到好多野好得意都有講 "我想要呢個", 但見我地冇咩反應都冇再要求, 摸下玩幾下就算, 最後真係只係買左泥膠就返屋企, 乖女!

查實個情景係咁既 -- 秋秋先行去羅泊車優惠, 我抱住弟弟, 小慈推住 BB 車慢慢跟住爸爸行, 係我衰, 行行下先發覺漏左張會員咭係反反城, 於是我叫小慈返轉頭, 我去收銀處攞返張咭, 轉身已經見到秋秋羅完泊車優惠返黎, 走得!  咪住 ......... 小慈呢??????  依?  明明見到小慈同我一齊掉頭行返去反反城架?!  去左邊呀??  心都離埋係人群中搵, 秋秋又返轉頭沿路搵, 冇喎!!  前後都唔夠 2 分鐘, 去左邊呀?  反反城門口有閘, 小慈冇理由夠力會推到架 BB 車入閘架?!!  唔理, 準備照衝入去搵之際, 見到個姐姐拖住小慈, 位置只係另一行收銀機!!  估計應該係小慈有跟住我行, 但我轉彎轉得快佢睇唔到我就轉左入另一個彎!  

虛驚一場 @.@  不過秋秋既即時反應都係鬧小慈唔拖住媽媽!!  我既 focus point 反而係小慈拖住反反城姐姐!!  我問小慈: 

"係唔係唔見左媽媽呀?"

小慈: "係呀!  頭先見唔到媽媽同埋弟弟攞!"

我: "咁你點呀?"

小慈: "我冇企係度喊呀, 我去搵著制服既姐姐幫我呀!"

我: "你同姐姐講咩呀?"

小慈: "我話俾佢聽唔見左媽媽, 不過佢地好忙要收錢呀!  第 3 個姐姐先拖住我"

我: "小慈你好勇敢呀!  你好叻咁識搵姐姐幫手, 媽媽好欣賞你呀!"

小慈: "頭先我都有少少驚架, 不過我冇喊!"

我: "媽媽好開心呀! 媽媽今日要叫你做 " 勇敢的小慈呀!!! "

我真係好開心因為小慈今日既表現完全係依足我平時教佢既一樣!!  我有同佢講過一本故事書叫 "迷路", 教過佢唔見左媽媽要點做, 亦都有教佢認邊個叫做著制服既職員!  所以我既感受真係好深! 

小慈, 你真係好聰明, 遇事鎮定, 媽媽好驕傲!!!!

小馬

多謝 Connie 姨姨送左隻小馬俾小慈小明玩我地一帶隻小馬返屋企, 小慈已經歡呼~~弟弟仲即刻極速爬黎攬住隻馬, 唔駛教, 弟弟自己識騎上去

小慈玩到唔肯落番黎

小慈話弟弟唔識搖要係後面幫手

爭取表現

秋秋星期六要返工, 我繼續大覺訓時隱約聽到兩父女既對話....

小慈: "爸爸, 你要返工呀?  媽媽呢?"

爸爸: "媽媽訓緊覺呀"

小慈: "媽媽訓多一陣就會起身同我玩架勒!  好啦, 你走啦!  我唔會喊架!  你要小心渣車喎"

爸爸: "好啦, 乖喇, 爸爸走喇"

小慈: " Bye Bye 爸爸, 錫爸爸一啖先.... 姐姐到你喇, 你都錫爸爸一啖啦, 佢要返工喇!  姐姐, come, kiss Pa Pa....."

XDDDD  笑死我喇!!  即刻咩睡意都冇晒, 幾想衝出去睇下秋秋同工人點收科 XDDDD

稍後, 當我對住扭眼訓但仲未肯訓既弟弟, 訓話佢 "弟弟曳曳!!" 時.....

小慈: "媽媽, 我會好乖架!"

當我 No 緊弟弟攪電制摸電線入廚房廁所時......

小慈: "媽媽, 我會好聽話架!"

當我話緊弟弟係咁掉晒 d 玩具落地會整爛時......

小慈: "媽媽, 我唔會咁架, 我會好小心架!"

當我話緊喊唔停既弟弟再喊就冇人睬佢時......

小慈: "媽媽, 我係一個開心小朋友黎架!  我咁乖, 梗係鍾意同我玩啦!"

果然係言者冇心, 聽者有意!  反之, 到小慈自己做錯事曳曳, 咁小慈又會講咩呢?

小慈: "媽媽, 我唔係有心架, 可唔可以原諒我呀?"

仲有, 當我開始想鬧佢, 語氣稍重既時候....

小慈: "媽媽, 我好鍾意你架!"

對住呢 D 口甜舌滑既小朋友, 當堂鬧唔落口.....

去公園

今日陽光普照, 最適宜戶外活動!  好啦, 帶弟弟去公園玩下, 估唔到仲有新發現....

弟弟 11 個月

小慈 9 個月

不經意戴番同一頂帽, 小慈同小明真係出奇地似樣!!  好多朋友都話弟弟越大越似小慈, 連爸爸都要定神先分到邊個係邊個呢!  好攪笑呀!!

弟弟第 1 個大型生日派對@逸東酒店

媽媽不復當年勇已經唔再係 BB 網既活躍份子, 所以都冇幫弟弟認識到一 d 同年同月出世既小朋友仔, 有 d 內疚.....  於是幫弟弟報名參加左 2 個大型既 11月 BB 1 歲生日 party!!  第一個係 11月頭由 facebook 主辦既, 另一個係 11月尾 BK 媽媽會攪既, 非常誇張地一出 post 已經額滿 @.@  我都係咁好彩有後補位先參加到咋!!   踏入11月, 弟弟 1 歲生日 party 正式開始~~

你睇而家 d 主辦單位幾 professional!!  有場刊, 有 rundown, 有 bb 簡介, 真係好精美!

一入場有咁大隻 Mickey Minnie, 小慈開心到飛起!

影張全家幅先

我地第 1 次參加咁大型既 party, 逸東酒店 ballroom 好大, 延開 28席

弟弟今日超乖, 食飽自己訓覺, 一訓訓左個半鐘!

 訓飽周圍望, 係人撩佢都笑, 超級可愛~~ 好抵錫!

呢個叫維維, 佢同小明一樣同年同月同日出世

2008年11月出世而今日又有參加 party 既 BB 已經有 71 個, 人多勢眾

呢一堆全部都係 11月出世既男 BB, 見唔見到小明呀?