太空館天象廳

好耐好耐冇去過太空館, 聽聞佢地可以 $24 在港睇冰島極光, 呢個全新節目咁吸引, 梗係引到我地入場啦!   小慈小明一聽到去隻「蛋」度玩就好開心 ^^

就係呢套夢幻極光, 以前試過即場買飛要去到好夜先有位, 今次穩陣 D 一早上網買定飛

上網買飛時發現仲有套「原野非洲」又係好吸引, 小明最鍾意非洲大象實開心屎佢!  片長 42 分鐘抵睇過極光, 時間又 fit, 梗係一次過睇埋啦 :)

入場喇~~

極光的產生, 是由於太陽風粒子與大氣層相撞而成, 極光的顏色取決於大氣層中哪些氣體正被激發, 激發時的不同高度都會令光的顏色有異.  最常見的綠色是因為 100-150 km 氧的含量最高; 洋紅色是 80-100 km 氮分子最多, 藍色和紫色最罕見, 因它們傾向太陽活動強烈時出現, 而且肉眼很難看到

極光就座無虛席, 原野非洲少人好多, 不過都有小學包場黎睇

呢隻小蜥蝪獨特既舞步令全場爆笑!!!

太空館裝修冇得玩住, 只可以去禮品店裝裝下

冇得玩梗係冇咁高興啦, 依~~ 之前科學館兒童天地好似話重新裝修, 就去八一八 ^^  係好靚, 仲用 Miffy 做主題, 可惜星期六實在太多人, 佢地引入左澳門科學館既小小工程師吸引大堆小朋友, 小慈小明已經高得滯冇份玩

好在當年去澳門都有玩過, 而家睇番佢地細個真係好可愛 ^^

仲有好多其他野玩, 唔駛擔心

新聞報導員

搖控車

畢氏定理

聲音與影像

考智力時間, 小慈一 take 就砌到, 好開心

好玩!  好玩!  小朋友仲要免費入場, 考完試再黎玩過~

提摩太2日1夜生活營

舊年去 camp 實在太開心, 今年星期日連5月1日公眾假期, 我地梗係把握好時機又一齊去 camp 喇~~

完左崇拜食完飯就搭的士去九龍塘轉火車去粉嶺, 再包一架小巴入 camp, 一班人有講有笑不覺路遠, 話咁快就到粉嶺浸會園

好開心, 嘉良叔叔帶埋初生既智培入 camp, 佢地一家 5 口真係鐵人黎架!  非常佩服

上次係家庭房, 今次還原基本步, 入 camp 梗係男左女右, 一人一間大房啦!

女仔人數比男仔少好多, 所以我地間營舍有床位剩, 好闊落

放低行李我地有自由活動時間, 成班小朋友走晒去公園玩

想當年小慈跟幼稚園黎浸會園, 佢淨係踎係地下玩沙都唔玩其他野

呢個圈圈仲係度, 保養得好好呀!

手工時間!  嘉良叔叔教大家整電動紙飛機

努力砌砌砌

秋秋都砌左一架

試飛

由初初插水式撞落地到越飛越高, 飛上樹頂, 飛出馬路, 予予隻飛機仲飛左去後山唔見左!!  好厲害呀!!

呢個遊戲真係好好玩, 大家都好努力研究點樣令自己隻飛機飛得好 D, 探究精神出晒黎!

食晚飯前又有自由時間, 小慈幫手揍智培

男孩子走晒去打籃球, 秋秋都有落場, 不過當然不復當年勇啦~

唔識打籃球既繼續玩紙飛機

晚飯後係詩歌分享同遊戲時間, Keynes 叔叔帶領大家玩看圖估物, 分兩組玩, 每個組員出黎畫 3 樣物件, 鬥快估中, 全組都要畫, 最快完成就為之贏

大家都好緊張, 衝晒出去圍住白板估, 阮生畫外星人, 秋秋要畫旋轉木馬真係想死, 我好 D, 我畫電芯同介指

笑爆嘴 :D

第二個遊戲係類似橋牌, 大家既牌面就係提摩太團團員最鍾意食既生果, 越多人鍾意個樣生果就越高分

講開食, 係時候食宵夜同生果喇

好好味!!

洗完白白大家都呢埋係營舍嘆冷氣玩 UNO, 太少女仔唔夠人玩, 小明過黎鄧腳

第二朝 8:00 am 食早餐, 大家都好準時起床, very good!

食飽飽我地就上各各他山

清晨起來歌頌主, 重要是祢!!

而家到出 camp 前都係自由時間, 解散前影張大合照先 ^^

又即刻去公園玩

仲有學打籃球

玩繩網

小慈小明玩繩網好認真, 表情好攪笑

Keynes 叔叔一個睇 4 個

我同秋秋就好悠閒咁盪鞦韆傾下偈

係時候出營了

Bye Bye 浸會園

今次去 camp 真係好輕鬆, 冇咩行程經常自由活動真係好正!